Раççей çунтарайман техника пулман-ха

Тӳреме кӗрсенех техника тӗрлӗреннинчен ытла вӗсем камсен пулни куçа тăрăнать. Америка, Германи, Финлянди, Турци... НАТО çӗршывӗсем Украина аллипе çак хӗç-пăшалпа пире хирӗç çапăçаççӗ паян. Анчах хуçисем тем чуль мухтансан та, вӗсем те лайăх çунаççӗ. «Çак курава йӗркелесе эпир НАТО хăй техникине ăçта янине, кайран вӗсем ăçта пулнине пӗтӗм тӗнчене кăтартатпăр», –  кӗскен пӗлтерчӗ ентешӗмӗр Раççей Геройӗ Энвер Альбертович Набиев офицер-танкист куравăн тӗп шухăшне.

– Ку ак, «Абрамс» (M1), тӗнчери чи пысăк та йывăр танк. Пӗтӗмпе 67 тонна таять. Тӗрӗссипе, хăй йывăрăшӗпе хăйнех путарчӗ. Ăна пирӗн «Центр» çар группировкин салтакӗсем ак çак дрон-камикадзепех персе чарчӗç, – терӗ курав ертӳçи Жангар Даров Америкăн танкӗнчен ытларах ун çийӗн çакăнса тăракан пӗчӗк дрон çине кăтартса. Пӗр техникăран теприн патне куçса характеристики, ăçта тата мӗнле персе лектернине тӗплӗн каласа пычӗ вăл. Сăмах май,  курава тăратнă техникăсем Авдеевка, Донецк енче трофея илнисем иккен. 

Трофейпа салтаксем хăйсем те тӗплӗн паллаштараççӗ. Ăна мӗнле тата кам пенине техникăсем умӗнчи уйрăм стендсем çинче вуласа кăна мар, унти QR-кодпа кӗрсе видео пăхма та пулать.

Техникăна хирӗç лартнă пысăк палаткăра вара АПШ, Швеципе Украинăн пемелли хӗç-пăшалне, АПШ Браунинг пулеметне, Украинăн 40 миллиметрлă УАГ-40 гранатометне, пӗтӗмпе 40 трофей-экспонат тăратнă. 

Ятарлă çар операцийӗнче хăюлăх кăтартнă Раççей Геройӗсене те чӗннӗччӗ курава. Ноябрӗн 13-мӗшӗнче Хусанта «Вахта Героев Отечества» акци ирттерме вун пиллӗкӗн килнӗччӗ вӗсем. Аса илтеретпӗр, Совет Союзӗн, Раççей Федерацийӗн Геройӗсене, Мухтав орденӗн тулли кавалерӗсене пӗрлештерекен ассоциаци 2014 çултанпа кашни уйăхрах пӗр-пӗр Раççей субъектӗнче «Вахта Героев Отечества» акци ирттерет. Çак вăхăтра Паттăрсем общественноçпа, студентсемпе, çар училищисен курсанчӗсемпе патриотизм темипе тӗлпулусем йӗркелеççӗ.

– Пирӗн тӗллев – çитӗнекен ăрăва Тăван çӗршывăн Аслă вăрçи, Афганистан, Çурçӗр Кавказ, Сири, халӗ акă Украинăри хӗç-пăшаллă хирӗçтăрусем çинчен тӗрӗссине пӗлтересси, хамăр салтаксемпе офицерсен хăюлăхӗ çинчен каласа парасси», – терӗ Дагестан Республикин Хăрушсăрлăх канашӗн секретарӗ, Раççей Геройӗ Магомед Гусейнович  Баачилов генерал-майор акцин тӗллевне палăртса. 

Сăмах май, ку акци Тутарстанра иккӗмӗш хут иртет, пӗрремӗшӗ пӗлтӗр пулнă. 

Раççейӗн тепӗр Геройӗ, СВО ветеранӗ Максим Владимирович Шоломов подполковник, тӗслӗхрен, шкулсенче, институтсемпе университетсенче, çар училищисенче атьсене Украинăри ятарлă çар операцийӗнче мӗн пулса иртнине хăй куçӗпе курнине каласа парас тӗллевпех Мускавран килнӗ.

«Хамăр атьсемпе мăнуксене тӳремсенче тем те пӗр кăшкăрашса сиктерес, храмсене кӗрсе тустарттарас, халăх мăнаçлăхӗ пулнă палăксене иштерес, ветерансен кăкăрӗсем çинчи Георги хăйăвӗсемпе наградисене илсе пăрахтарас килмест пирӗн. Çавăнпа çакăн пек акцисем ирттерсе тӗрӗссине каласа паратпăр та эпир. Пире çар техникин куравне пăхма йыхравларӗç акă.  Куратăр ӗнтӗ,  Украинăна  мӗн чухлӗ çӗршыв пулăшсан та пирӗн салтаксем наци интересӗсене тивӗçлӗ хӳтӗлеççӗ, çар комиссариатне хăйсен ирӗкӗпе килекенсем кăна мӗн чухлӗн. Раççей вăл амбициллӗ, чун хавалӗллӗ, хăйӗн интересӗсемпе ирӗклӗхӗшӗн хăюллă кӗрешекен пӗртен-пӗр çӗршыв паян тӗнчере. Шел, вăрçă вăл вăрçах, ыратусăр мар. Çапах та пӗрле чух, пире çӗнтереймеççӗ», – терӗ йывăр суранланнă пулсан та (икӗ аллине те çухатнă) стройрах юлнă хăюллă офицер. 

Çакăн пек паттăрсем çинче тытăнса тăрать те Раççей. Техника тенӗрен, пирӗн салтак çунтарайманни çут тӗнчере пулман-ха хальччен.

Аса илтеретпӗр, курав Хусанта ноябрӗн 19-мӗшӗччен, кашни кун ирхине 10 сехетрен пуçласа 16 сехетчен, ӗçлет.
 
Ирина КУЗЬМИНА.
Автор сăнӳкерчӗкӗсем.