Рустам Минниханов инвалидсем валли ӗç вырăнӗсем тума хушнă

Канашлу пӗтӗм муниципаллă районсемпе видеоконференци мелӗпе иртнӗ.

«Ку кирлӗ тата обществăлла пӗлтерӗшлӗ кун, сывлăх енчен çирӗпех мар çынсен проблемисене татса парасси çине тата  вăйлăрах тимлӗх уйăрмалла. Паян республикăра сывлăх енчен çирӗпех мар 282 пин çын пурăнать. Çав шутра 17 пин ача. Патшалăх влаçӗн мӗнпур органӗн ертӳçисене, муниципаллă районсемпе хула округӗсен пуçлăхӗсене, предприятисемпе организацисене ертсе пыракансене обществăлла вырăнсенче, социаллă учрежденисенче, çуртсенче пурăнма юрăхлă хутлăха йӗркелес ӗçе малалла тăсмалла», – пӗлтернӗ ТР Раисӗ Рустам Минниханов. 

Рустам Минниханов çавăн пек инвалидсем валли ӗç вырăнӗсем йӗркелессипе тата вӗсен ӗçлӗхне ӳстерессипе ӗçлемеллине каласа хăварнă. Уйрăм тимлӗх ятарлă çар операцине хутшăнса инвалид пулса  таврăннисене уйăрма хушнă.

Медицина пулăшăвне илессинче те мӗн пур кирлӗ условипе тивӗçтермелле, уйрăмах инвалид ачасене.

«Ачасемшӗн хушма пӗлӳ, физкультурăпа спорта хутшăни питӗ пӗлтерӗшлӗ – пурте вӗсемшӗн юрăхлă пулмалла», – каласа хăварнă Рустам Минниханов.

Инвалидсен декади шайӗнче – декабрӗн 1-мӗшӗнчен пуçласа 10-мӗшӗччен – тематикăлла тӗлпулусем, культурăпа спорт мероприятийӗсем йӗркелеме хушнă ТР Раисӗ.

Пӗтӗм тӗнчӗри инвалидсен кунне декабрӗн 3-мӗшӗнче паллă тăваççӗ.