Сбербанк чăвашла калаçать

Çакăн пек специалистсем тăрăшнипе интернетра чăваш ресурсӗсем пур паян: мессенджерсенче, IRC, электронлă почтăра чăвашлах текст е сасă çыртаратпăр, мультимеди произведенийӗсене упрама, пӗр-пӗрне яма пултаратпăр. Ку ресурссемпе паян тӗнчен тӗрлӗ кӗтесӗнче пурăнакан чăвашсем усă кураяççӗ.

Чăваш чӗлхин электронлă куçаруçи пурри те калама çук пысăк пӗлтерӗшлине палăртмалла. Унпа тӗнчипех усă курма май пуртан чӗлхене пӗтме памасть вăл. Программа чăвашларан вырăсла та, вырăсларан чăвашла та çеккунтрах куçарма май парать. Икӗ мелӗ те питӗ кирлӗ. Пӗрремӗшӗ чӗлхене пӗлмен çынна ăнланма пулăшать пулсан, тепри – чăваш чӗлхипе анлă усă куракансене, тӗслӗхрен, массăллă хыпар хатӗрӗсен ӗçченӗсене ӗçлеме. Программăпа чăвашла калаçакансем те, чӗлхене вӗренес текенсем те усă кураççӗ. Чăн та, электронлă куçарăвăн ӗçне малалла аталантармалли нумай-ха, хăвăрт  кăна пулса пӗтмелли япала мар вăл. Куçару кашнинчех яка пулса пыманнине чăвашла пӗлекенсем хамăр та куратпăр. Шанатпăр, ку çитменлӗхсем майпен пӗтсе пырӗç, мӗншӗн тесен технологисем çӗнелсех тăраççӗ. 

Чăваш чӗлхине цифровизацилесси 2020 çулта, «Яндекс. Переводчика» кӗнӗ хыççăн пуçланнă. Çак вăхăтранпа ку ӗç те вӗçӗмсӗр аталанать. Икӗ çул каялла, тӗслӗхрен, Сбербанк чăвашла калаçса кайни пӗлтерӗшлӗ пулăм пирӗншӗн.  SberDevices разработчиксен команди GPT-3 нейросечӗн нумай чӗлхеллӗ версине хута янă. Тӗнчери 61 чӗлхепе, çав шутра чăвашла та, текст çырать, сасăлатать вăл. Автоматизациленӗ системăна чăвашлах отзывсем яма, социаллă сетьсенче комментарисем çырма, çаплах калаçăва çыртарма пулать халӗ. 

Ку системăпа хуть кам та усă курма пултарать, кун валли СберДиска кӗрсе mGPT моделе уçласа кăна илмелле. 

Ирина КУЗЬМИНА.