СВОна хутшăннисем валли «Народный контроль» сервисăн çӗнӗ категорийӗ ӗçлеме пуçларӗ

«Народный контроль» сервисăн çӗнӗ категорийӗн тӗллевӗ — СВОна хутшăнакансемпе вӗсен çемйисен ыйтăвӗсене татса парас вăхăта чакарасси. Граждансем халӗ контрактлă çар служби, тӳлевсем, çăмăллăхсем, социаллă тивӗçтерӳ, пӗлӳ илесси, ӗçе вырнаçасси, медицинăпа психологи тата гуманитари пулăшăвӗсем, СВО ветеранӗсемпе пуç хунисен çемйисене социаллă пулăшу парасси, СВОри çар чаçӗсен снабженийӗ тата ытти çакнашкал ыйтусем çине ниçта каймасăрах тулли хурав илме пултараççӗ.

Ыйтусене ушкăнласа кашнин модераторне (министерствăсем, «Защитники Отечества» фондăн Тутарстанри уйрăмӗ, РФ Социаллă фончӗн Тутарстанри уйрăмӗ, ТР Çар комиссариачӗ, РФ Налог службин Тутарстанри уйрăмӗ) çирӗплетнӗ.

Ыйтусемпе ӗçлемелли схема та хатӗр. Калăпăр, 117 телефон номерӗпе «хӗрӳ линие» килнӗ ыйтăва йышăнаççӗ те колл-центра çитереççӗ, енчен те анлăрах та тӗплӗнрех пăхса тухмалли пулсан — «Народный контроль» сервиса яраççӗ. Кунта пӗр талăкрах гражданинăн даннăйӗсене палăртса çырнă уведомление ку е вăл ыйтушăн яваплă ведомствăна параççӗ. Сăмах май, кашни модератор методика рекомендацийӗсене хатӗрлесе тематикине палăртнă. Çавăнпа колл-центрсем вӗсем çине таянса ӗçлеççӗ.

Сария Сабурская каланă тăрăх, «Народный контроль» сервисăн çӗнӗ категорийӗ хупă режимпа ӗçлет. Урăхла каласан, харпăр даннăйсем пуртан ыйтăва гражданин хăй тата ыйтăва татса паракан ведомство кăна курать. СВОна хутшăннисемпе вӗсен çемйисем хăйсене хумхантаракан ыйтăва «хӗрӳ лини» урлă кăна мар, Патшалăх услугисен порталӗ, «Народный контроль» мобильлӗ приложени урлă та яма пултараççӗ.