«Таткрафтăн» 5-мӗш конкурсӗ пырать
БРИКС çӗршывӗсен организацийӗн председателӗ кăçал Раççей пулнăран тӗрлӗ шайри мероприяти нумай иртрӗ. Ытларахăшӗ Хусанта. Хутшăнусем тӗрлӗ сферăра пулсан та тӗллевӗ пӗр — пӗр-пӗринпе лайăхрах паллашса кашни еншӗн усăллă çыхăнусем йӗркелесси. «Миллиард Татар» интернет-портал Майнкрафт виртуаллă вăйăсен тӗнчинче паллă архитектруа çурчӗсем тăвассипе «Таткрафт» пиллӗкмӗш конкурсне çак темăна халалласа «Тутарстан БРИКС хулисене тăвать» ят панă. Тӗллевӗ –тӗнчен тӗрлӗ кӗтесӗнчи виртуаллă строителӗсене пухса пӗрле паллă çуртсем тăвасси кăна мар, БРИКС çӗршывӗсен историпе культура еткерлӗхне сарасси те.
Турнир августăн 12-мӗшӗнчех пуçланнă, анчах ун пирки пресс-конференци августăн 20-мӗшӗнче кăна пулчӗ. «Миллиард Татар» проекта хутшăнакан Ильгизар Вахитов çакна пирвайхи результатсем пулмасăр пӗлтерес теменнипе çыхăнтарчӗ. Турнира Раççей, Китай, Бразили, Африка, Кăнтăр Ази, Хӗвелтухăç çӗршывӗсен командисем, пурӗ 200 çын ытла, хутшăнаççӗ.
.
Виртуаллă строительсем пӗр эрнере Бразили, Арабсен Пӗрлештернӗ Эмирачӗн, Кăнтăр Африка, Иранпа Китайăн паллă çурчӗсене тума та ӗлкӗрнӗ. Çав шутра Хусанти Старая Татарская Слободари пӗчӗк участока тата Г.Тукай ячӗллӗ аэропортпа «Казань Экспо» халăхсен хушшинчи курав центрне те. Сăмах май, конкурсăн партнерӗ «ТН-Наследие» АНО аэропортшăн ятарлă приз хатӗрленӗ.
Ильгизар Вахитов сăмахӗсемпе, конкурспа Тегеран питӗ интересленет, вӗсемпе йӗркелӳçӗсем çак кунсенче калаçнă. Иран та ку конкурса массăллă хыпар хатӗрӗсенче çутатасшăн.
Креативлă конкурса Раççей кăна мар, ют çӗршыври партнерсем те тӗрев панă. Хусанти Китай консульствин ертӳçин çумӗ Цао Лунцюань та пресс-конференцие килнӗччӗ. Вăл хăй сăмахне РФ Президенчӗн В.Путинпа КХР Председателӗн Си Цзиньпинăн йышăнăвӗпе 2024-2025 çулсем Раççейпе Китай культурисен çулталăкӗ пулнинчен пуçларӗ. Тутарстан йӗркеленӗ «Таткрафт» конкурс шăпах культурăпа ылмашăнмалли пай пулнине, Китайăн 30 киберспортсменӗ хутшăннине каларӗ. Çакăн йышши конкурссене консульство яланах тӗрев пама хатӗррине палăртрӗ.
Турнира çаплах ХФУн Халăхсен хушшинчи хутшăнусен институчӗ те тӗрев парать. Институтăн халăхсен хушшинчи ӗçӗсем енӗпе директорӗн çумӗн Светлана Тахтаровăн сăмахӗсемпе кун йышши конкурссем пит кирлӗ, вӗсем креатива, пӗр-пӗринпе хутшăнма тата командăпа ӗçлеме вӗрентеççӗ.
Виртуаллă строительсен турнирӗ пуçланнă кăна-ха, умра тата нумай ӗç. Конкурсăн положенийӗ тăрăх, строительство Майнкрафтпа Дискорд серверӗсенче тата турнир картти çинче палăртнă вырăнсенче кăна пымалла. Ку пӗрре те çăмăл ӗç мар, объектсен хăйсен йывăрлăхӗсем. Строительсен кунта илеме кăна шута илни çителӗксӗр. Объектсене TeamCIS команди ятарлă калькулятор программа урлă хаклать. Приз фончӗ кăçал пӗчӗк мар — 85 пин тенкӗ. Кун чухлӗ вăл нихăçан та пулман.
Турнир августăн 31-мӗшӗнче вӗçленет, çӗнтерӳçӗсем сентябрӗн 9-мӗшӗнче паллă пулаççӗ. (Рамиль Гали сăнӳкерчӗкӗ /«Татар-информ» ИА).
Следите за самым важным и интересным в Telegram-каналеТатмедиа
Нет комментариев