Теччӗ районӗнчи Çармăс ялӗнче пурăнакансем хӗлле те кичемленсе лармаççӗ

Ак, тӗслӗхрен, декабрӗн 31-мӗшӗнче чи пӗчӗккисемпе вăтам çулти ачасем валли çӗннине пӗлме пулăшакан «Çӗнӗ çул вăхăтӗнчи тӗлӗнтермӗшсем» программа хатӗрленӗччӗ. Библиотекарь шăпăрлансене Çӗнӗ çул уявӗ, йăли-йӗрки, ку праçник хăçан пуçланса кайни, чăрăша илемлетнин историйӗ пирки интереслӗ каласа пачӗ. Унтан ачасем паллă çыравçăсен хӗллепе çыхăннă юмахӗсемпе паллашрӗç. 

Январӗн 3-мӗшӗнче «Кӗнеке вулама, унти сăнарсене пӗлме юрататпăр» литература вăййи иртрӗ. Ун хыççăн пӗр ача та кӗнекесӗр каймарӗ библиотекăран. 

Хӗлле çанталăк сивӗ пулсан та ялан пӳртре кăна ларас килмест вӗт-ха. Çавăнпа та январӗн 4-мӗшӗнче ачасемпе урамра хӗллехи вăйăсем вылярăмăр. 

Кăçал пирӗн ентешӗмӗр, чăвашсене çутта кăларакан И.Я.Яковлев çуралнăранпа 175 çул çитет. Январӗн 5-мӗшӗнче Иван Яковлевичăн калавӗсене вуларăмăр шкул ачисемпе, унăн биографийӗпе, ӗçӗ-хӗлӗпе  паллашрăмăр. 

Январӗн 6-мӗшӗнче поэзие юратакан ачасемпе литература сехечӗ йӗркелерӗмӗр, аслисемпе вара хӗллехи уявсем пирки калаçрăмăр. Кашни Раштавпа, Кăшарнипе çыхăннă историсем каласа пачӗ. 

Лидия КАРАЕВА.

Автор сăнӳкерчӗкӗсем.