Тӗрӗслӗхре пирӗн вăй

Кайран та мирлӗ пурнăçра курăнкаланă политика плакачӗсем. Вӗсем, тӗпрен илсен, империализма хирӗç, чикӗ леш енчи капиталистсене, хӗç-пăшал туса сутакансене питленӗ. «Крокодил», «Чаян», «Капкăн» журналсен страницисенче ытларах хăйсен вырăнне тупнă плакат ӳкерекен ӳнерçӗсем. 

Мирлӗ пурăнакан халăх пит асăрхасах кайман вӗсене (асра хăварни пулманах-тăр). Совет Союзӗ аркансан ӳнер искусствин çак жанрӗ пачах пӗтнӗ темӗпӗр, вăл тăруках тематикине улăштарнă – сутуçăсен таварне, услугине рекламăласси пулса тăнă унăн ӗçӗ. 

Социаллă плакатсен ӗмӗрӗ тахçанах иртсе кайнă тенӗ пулӗ ун чух. Анчах самана XXI ӗмӗрте те плакат çинчи ӳкерчӗк çав-çавах çивӗч пӗлтерӗшлӗ пулнине кăтартать. Çакна Хусанта тухса тăракан «Чаян» журналăн куравӗсем, конкурсӗсем те çирӗплетеççӗ.

Иртнӗ уйăхра вара ТР Çамрăксен министерствипе «МИР» культура пуçарăвӗсене тӗрев паракан ассоциаци Президентăн культура пуçарăвӗсен фончӗн гранчӗпе (1,5 миллион тенке яхăн) «Тӗрӗслӗхре пирӗн вăй» политика плакачӗсен конкурсӗ уçăлнине пӗлтерчӗç. ТР Культура министерстви ку ӗçре партнер пулса пулăшса пырать. 

Проектăн кураторӗ Хусан фотографӗ Евгений Кулешов. 

Малтанах конкурса 14–18 çулсенчи çамрăксене хутшăнтарма шутланă. Анчах ӳнер ӗçне вӗрентекенсемпе канашланă хыççăн йӗркене улăштарас тенӗ: икӗ категорипе иртнӗ конкурс – 14 – 18 тата 19 – 30 çулсенчи çамрăксемпе. 

Евгений Викторович шучӗпе   Строительство институтӗнче, культура институтӗнче ку жанрпа ӳкерекен студентсем сахал мар. Çаплах Хусанти ӳнер шкулӗсенче вӗренекенсем, Н.Фешин ячӗллӗ училище студенчӗсен те хутшăнма кăмăл пулӗ. 

«Тӗрӗслӗхре пирӗн вăй» кăçал пӗрремӗш хут республика шайӗнче иртет. Ноябрӗн 15-мӗшӗнчен йӗркелӳçӗсем заявкăсем йышăнма пуçланă та ӗнтӗ. 2025 çулхи мартăн 15-мӗшӗччен йышăнӗç ӗçсене. 

Конкурс тăватă номинаципе иртет: агитаци (классика мелӗпе) плакачӗ, карикатура (сатира), компьютер графики  тата коллаж. Ӗçсен 40х60 тата 60х80 сантиметр калăпăшпа пулмалла. Вертикальпе те, горизонтальпе те юрать.

Апрель уйăхӗнче экспертсем конкурса пӗтӗмлетӗç. Чи лайăххисене Хальхи вăхăтри искусство галерейинче «Тăван çӗршывăн Аслă вăрçинче çӗнтернӗренпе 80 çул» курава тăратӗç.

Конкурса хутшăнакансен хăйсен ӗçӗсенче икӗ критерие çирӗп пăхăнмалла – композици тата автор калас тенине куракан пӗрре пăхса ăнлантăр (выразительность). Ытлашши сăмах вакламасăр, шухăша кӗскен палăртмалли çинчен астутарчӗ жюри пайташӗ, Тутарстан халăх художникӗ Рашит Валиуллин. 

Кашни номинаципе чи лайăх плакатсене 250-шар экземпляр пичетлеме йышăннă. Вӗсене обществăлла вырăнсенче курма пулӗ – лавккасенче, транспортра, çар чаçӗсенче. Паллах, конкурсра çӗнтерекенсене укçан премипе хавхалантарассине те шута илнӗ. Вырăнне кура 15, 10 тата 5 пин тенкӗ парӗç. 

Проект Тăван çӗршыв хӳтӗлевçин çулталăкӗнче иртет. Майăн 9-мӗшне, Аслă вăрçă пӗтнӗренпе 80 çул çитнӗ тӗле, çӗнтерӳçӗсем паллă пулӗç. 

Татьяна ВАСИЛЬЕВА.