Тутарстанра хăçан хӗл ларать?

Хусанти федераллă университетăн профессорӗ, географи наукисен докторӗ Юрий Переведенцев Тутарстанра хăçан юр ларасси пирки каланă.

«Нумай çулхи климат нормисене пăхсан Тутарстан Республикин тӗп хулинче юр ноябрӗн 19 – 21-мӗшӗсенче çӗре витмелле. Çак тапхăрта талăкри вăтам температура -5 градусран та анса пырать. Анчах та çулпа çул пӗр мар – ирӗлмен юр декабрь уйăхӗнче кăна ларни те пулкаланă. Хальлӗхе çанталăк ăшă тăнипе юр çăвасси курăнмасть-ха. Пӗтӗмпех Атлантика малашне пирӗн çине еплерех витӗм панинчен килет», – тенӗ профессор.

Маларах палăртнă прогноз тăрăх, декабрь Хусанта сивӗ пулать, январь – климат нормисемпе килӗшӳллӗ, февраль – ытти çулхисенчен ăшăрах.

Енчен те çулталăкăн юлашки уйăхӗ сивӗ пулчӗ-тӗк, декабрьте нумай юр çăвасса кӗтмелле мар. Çапах та хӗл тăршшӗпе юр нормăран кая пулмӗ тесе шантараççӗ метеорологсем. 

А.Наумов сăнӳкерчӗкӗ.