Улатакка вăрманта вăрахчен йывăçа таккать – çанталăк пăсăласса

• Раштав уйăхӗн 9-мӗшӗ – Юрий, Егор. Ку кун сивӗ-тӗк, çанталăк часах ăшăтмасть. Çак кунччен пӗтӗм парăма татмалла. Ват сурăхсем чамине пӗлмесӗр утă çиеççӗ-тӗк – çил-тăман тухасса. 

• Раштав уйăхӗн 10-мӗшӗ – Роман. Ал ӗçӗ тума юрамасть. Пулла каймалла мар, пурпӗр ăнмасть. Çак кун çанталăк улшăнсах тăрсан хӗлӗпе çапла пулать. 

• Раштав уйăхӗн 11-мӗшӗ – кӗпшӗл (сойка) кайăк кунӗ. Çак кун кӗпшӗл чӳрече патне килсе сас пани – ырă паллă. Çын çак кайăк хыççăн кайса хăйӗн телейне тупма пултарать-мӗн. 

• Раштав уйăхӗн 12-мӗшӗ – Парамон. Урай шăлма та, çума та юрамасть. Юлташсемпе тăвансем патне хăнана каймалла. 

• Раштав уйăхӗн 13-мӗшӗ – Андрей.  Уяр та сивӗ пулсан çитес çул тырпул ăнса пулать. Пӗлӗтсем аялтан шăваççӗ – сивӗтессе. Ал ӗçӗ тума юрамасть. 

• Раштав уйăхӗн 14-мӗшӗ – Наум. Кӗнеке вуламалла, тӗпчевсем ирттермелле, ăс паракан кино пăхмалла – кӗскен каласан, пӗлӗве ӳстермелле. Çак кун çумăр е юр çусан тата виçӗ кун çăвать тет.