Вăл пирӗншӗн анне пекехчӗ

Хăтлава Вера Кузьминан çывăх çыннисем, тăванӗсем, власть органӗсенче, обществăлла организацисенче ӗçлекенсем, творчество çыннисем, наука ӗçченӗсем, аслă шкулсен преподавателӗсем, студентсемпе вӗренекенсем хутшăнчӗç. 
Вера Кузьмина çав терӗ талантлă çынччӗ. Театр сцени уншăн чăвашăн хальхи тӗнчекурăмне ăнланмалла кăтартса памалли вырăн пулнă. Çакна вăл хуть хăш халăх çынни çырнă хайлав тăрăх лартнă спектакльте те тума пултарнă. Ăна чăвашсен малашлăха витӗр кураканӗ тесен пӗртте йăнăш мар пек туйăнать. 
Хăтлавра сăмах калакансем пурте аслă актрисăна ăшшăн аса илчӗç, пурнăçра пулнă интереслӗ самантсене аса илчӗç. Вера Кузьминана халăх питӗ юрататчӗ, вăл пиртен кашниншӗн тăван халăх ятӗнчен калаçакан анне вырăнӗнчеччӗ. Пухăннисем пурте чăваш тӗнчи Вера Кузьминасăр пушанса юлнине палăртрӗç. Çавăн пекех кӗнеке-альбома çӳллӗ шайра хатӗрлесе кăларнине те асăнса хăварма манмарӗç.

Владимир СТЕПАНОВ.
Автор сăнӳкерчӗкӗсем.