Халăхсем нумай — çӗршыв пӗрре

Кăçал унăн тӗп шухăшӗ‎— «Халăхсем нумай — çӗршыв пӗрре». 
Этнографи диктанчӗн историйӗ 2016 çулта пуçланнă. Пӗремӗш хут йӗркеленӗ чухнех ăна Халăх пӗрлӗхӗн кунӗ умӗн иртттерме йышăннă. Пӗрремӗш çулах çӗршывӗпе 90 пин ытла çын хутшăннă. Çулран-çул диктант çыракансен шучӗ ӳссех пырать. Пӗлтӗр, тӗслӗхрен, Раççейӗпе илсен 13 миллион ытла çын хутшăннă ку акцие. 
Диктант тесе калатпăр, анчах вăл формипе анкетăна аса илтерет. 16 çула çитменнисем 20, çитӗннисен 30 ыйтуран тăракан диктанта 45 минутра хуравласа ӗлкӗрмелле. Çӗршыври халăхсен историйӗпе, культурипе, йăлипе çыхăннă ыйтусем. Кашнин çине хуравăн тăватă вариантне çырнă, хăвăр тӗрӗс тесе шутлаканнине суйласа илесси çеç юлать сирӗн. Диктанта хутшăннисене сертификат параççӗ. 
Этнографи диктанчӗ ноябрӗн 8-мӗшчен пырать. Ăна оффлайн (чылай çӗрте ноябрӗн 2-мӗшӗнче ирттерчӗç) тата онлайн miretno.ru сайтра регистраци иртсе çырма пулать. Сертификатне каярах хăвăр кăтартнă электронлă почăна ярса парӗç.
Тутарстанра этнографи диктантне çыракансем кашни çулах йышлă. Пӗлтӗр 46 пин ытла çын хутшăннă, кăçал ку цифра ӳсесси пирки иккӗленмеççӗ йӗркелӳçӗсем. 
Ноябрӗн 2-мӗшӗнче Хусанти Халăхсен Туслăх çуртӗнче ирттерме йышăннă диктанта. Хула пысăккине кура темиçе тапхăрпа иртет — 12.00 — 17.00 сехетсенче. Чи малтанах 11 сехетре пуçланчӗ. Унта ертӳçӗсем, наципе культура автономийӗн ертӳçисем хутшăнчӗç. Федераци Канашӗн пайташӗ, РФ Патшалăх Думинчи Тутарстан Республикин сенаторӗ Александр Михайлович Терентьев тата ТР Раисӗн шалти политикин ыйтăвӗсемпе Депараменчӗн наци политикине реализацилессипе управленийӗн пуçлăх çумӗ Евгений Петрович Ефимов пухăннисене саламларӗç. Этнографи диктантне çырма хутшăнни тавракурăма ӳстернине, юнашар пурăнакн халăхăн культурипе, йăли-йӗркипе ытларах интресленме хавхалантарать тесе пурне те диктант çырма чӗнчӗç. 
Диктант çырма ТР Патшалăх Канашӗн вӗрентӳпе, наукăпа , культурăпа тата наци ыйтăвӗсемпе комитетăн председатель çумӗ Ирина Терентьева, ТР çамрăксен ӗçӗсен минстрӗн çумӗ Айгуль Сабирова, Хусан патшалăх медицина университечӗн ректорӗ Алексей Созинов, Тутарстан Халăхсен Асамблейин ӗçтăвком ертӳçи Ренат Валиуллин, «Таткультресурсцентр» ертӳçи Асу Мифтахова тата наци культура обществисен ертӳçисем хутшăнчӗç.