Хамăр хӗрсене «Раççей чăваш пики – 2023» конкурсра ăнăçу сунатпăр!

«Тутарстан пики» конкурсăн Положенийӗпе, Раççей шайӗнчи конкурса республикăра çӗнтернӗ пике хутшăнма тивӗçет. 2023 çулта тӗп титула Çырчаллинчи Анастасия АЛЕКСЕЕВА çӗнсе илнӗччӗ.

Иккӗмӗш конкурсантка Аксу район пики Юлия ЕРЕМЕЕВА. Юля питӗ пултаруллă пике, вăл — ТР ЧНКА çумӗнчи «Аталан» пӗрлешӗвӗн лидерӗ, Хусанта тӗрӗк халăхӗсен пикисен хушшинче иртнӗ «Науруз гузэле – 2023» конкурсăн çӗнтерӳçи, Красноярскри «Азия — Сибирь – 2023» конкурсăн финалистки.

Анастасийăпа Юлия хăйсен пултарулăхне хальхинче те туллин кăтартасса иккӗленместпӗр, çавăнпа вӗсене пур енчен те ăнăçу сунатпăр! Эпир сире шанатпăр, эсир – маттурсем!

Аса илтеретпӗр, «Раççей чăваш пики — 2023» конкурс декабрӗн 16-мӗшӗнче Шупашкарти Чăваш драма театрĕнче кăнтăрла 12-ре пуçланать. (Сăнӳкерчӗксем «Тутарстан чăваш пики» конкурс дирекцийӗн тата Юлия Еремееван «ВКонтактери» страницисенчен).