Ҫынсенчен ытларахӑшӗ суйлава кайма хатӗр

Тутарстанра пурӑнакан суйлакансен 83% ТР Президентне суйлама кайма хатӗр. Ҫакӑн ҫинчен «Общественное мнение – Татарстан» фонд ирттернӗ соцопрос та ҫирӗплетет.
Суйлава хутшӑнмассине ҫынсен 13% пӗлтернӗ, суйлавҫӑсен 4 проценчӗ мӗн  хуравламаллине пӗлмен. Экспертсен шучӗпе президент суйлав кампанийӗпе муниципаллӑ суйлавсене пӗрлештернипе сасӑлама хатӗррисем нумай.
Респондентсен 81% Рустам Миннихановшӑн сасӑ парасшӑн. Ӑна халӑх йышлӑ тӗрев панине республикӑн экономика тата социаллӑ пурнӑҫ аталанӑвӗ ҫирӗп пулнипе ҫыхӑнтараҫҫӗ. Тутарстан инвестици климачӗн рейтингӗнче 2-мӗш вырӑн йышӑнать. Рустам Минниханов та ӑнӑҫлӑ регионсен пуҫлӑхӗсен списокӗнче малта пырать. Владимир Путин та унӑн ӗҫне ырлать. Республикӑра пурӑнакансенчен ҫурри ытла юлашки ҫулсенче Тутарстанра пулса иртекен ырӑ улшӑнусене Рустам Минниханов ячӗпе ҫыхӑнтараҫҫӗ.
Президент пулас текен ытти претендентсен рейтингӗ пысӑках мар.  Альмира Михеевпа Владимир Сурчиловшӑн 2-4% ҫын сасӑласшӑн, Альфред Валиевшӑн 5-7%.