Тар завочӗ куçса каять

Нумай çул тар пички çинче ларнă Хусан тинех ассăн сывласа ярӗ. Юлашки çулсенче кунти тар завочӗ çийӗн тӗтӗм час-часах йăсăрланни, çынсем вилнӗ тӗслӗхсем пулни сисчӗвлентермерӗ мар. Хула варринче тенӗ пекех вырнаçнă заводран мӗн кӗтмеллине никам та пӗлмест-çке. Мӗн тесен те, завод кивӗ, оборудовани те çӗнех мар.

Завода Удмурт Республикине куçарасси пирки калаçусем пӗлтӗр сентябрь уйăхӗнче, Кизнерте Раççейри юлашки химарсенала пӗтернӗ хыççăн, пуçланнăччӗ. РФ Промышленноçпа суту-илӳ завочӗн ертӳçи Мантуров РФ Президентне Хусанти тар заводне çӗнӗ площадкăна куçарма хатӗррине пӗлтернӗччӗ. Тар тата сирпӗнекен ытти япаласене малашне унта кăларма пулать-мӗн.

Халӗ ыйту татăлнă тесен те юрать. Тар завочӗ Хусантан куçса каять. Чăн та, хăçанни паллă мар-ха. Хальхи вăхăтра Удмуртире завод проектне хатӗрлеççӗ. Çак ӗçе РФ Промышленноçпа суту-илӳ министерстви тимлӗхре тытать.

Сăмах май, Кизнерта химарсенала пӗтернӗ, территорие санаци тунă хыççăн виçӗ çултан тар заводне тума тытăнӗç. Унччен вара пирӗн, хусансен, чăтмах тивет. (А.Эшкинин сăнӳкерчӗкӗ).