Ленинград çыннисем те чăвашла ташлама пӗлеççӗ

Ленинград облаçӗнчи Чăваш наципе культурин обществи питӗ хастар хутшăнчӗ. Валериан Гаврилов ертсе пыракан делегацире хăнасем Чăваш Енри Ольга Михайловна Сергеевăпа Мускаври Татьяна Александровна Алекссева та пурччӗ. Вӗсем иккӗшӗ те Канаш районӗнче çуралса ӳснӗ.

Этнофестивале кăçал çемьене тата ăна çирӗплетекен юратăва, ăнланупа пулăшăва тата ачасене халалланăччӗ. Сцена çинче хутăш çемьесемпе Ленинград облаçӗнче пурăнакан наци çемйисене чысларӗç. Матвеевсем, тӗслӗхрен, Алексей Игоревич казак, Валентина Александровна – чăваш. Валентина Александровна 9 çул ытла ӗнтӗ «Кевер» чăваш ташă ансамбльне çӳрет, халăхсем хушшинчи, Пӗтӗм Раççей конкурсӗсен лауреачӗ, Ленинград облаçӗн чăваш пики. Мăшăрӗпе Мирослава хӗр ӳстереççӗ. Матвеевсене йăлари халăх культурине сыхласа хăварма тӳпе кӗртнӗшӗн Дипломпа чысларӗç.

Йӗркелӳçӗсем чăнах та питӗ тăрăшни курăнчӗ: тӗрлӗ площадка, интерактивлă концертпа кану концерт программине, Ленинград облаçӗнчи ал ăстисен ярмарккине хатӗрленӗ.

Чăваш пӗрлешӗвӗнче тăракан Анастасия Петровна Степанова «чăваш кил-çурчӗпе» паллаштарнă май халăх культурипе йăли-йӗркисем çинчен каласа пачӗ. Хăй вăл Шупашкартан, косметолог, нумай ача амăшӗ, «Миссис Центральный район г. Санкт-Петербурга» йӗркелӳ комитечӗн пайташӗ, Ленинград облаçӗн 2023 çулхи вице-миссисӗ.

«Кевер» ташă ансамблӗн ертӳçи, Санкт-Петербург хулипе Ленинград облаçӗнчи чăваш çамрăкӗсен канашӗн пайташӗ, Пӗтӗм Раççей, халăхсем хушшинчи конкурссен лауреачӗ Пелагея Ильинична çав тери лайăх мастер-класс йӗркелесе чăваш ташшине ташлаттарчӗ. Тӗрлӗ халăх представителӗсем те чăтса тăраймарӗç, хаваспах чăвашла ташлама вӗренчӗç.

Этнофестиваль символне, йывăç ладьяна, 2025 çулта мероприятие йышăнакан тепӗр хулана панă церемони çав тери кăмăллă иртрӗ. Гатчино администрацийӗн пуçлăхӗ Галина Нещадим ăна Киров районне пачӗ.

27 çул пӗрле килӗштерсе пурăнакан, ывăл ӳстернӗ Лидăпа Денис Бураксем çемье вучахне Гатчинăри тин кăна пӗрлешнӗ çемьене пачӗç. Çамрăксене вӗсем çемье хаклăхӗсене упраса хăварни питӗ кирлине аса илтерчӗç. Шăпах вӗсем Ленинград облаçӗнче килӗштерсе пурăнакан халăхсене пӗрлештерсе тăраççӗ те. (Валериан ГАВРИЛОВ. Санкт-Петербург хули. Автор сăнӳкерчӗкӗсем).