Чăваш кăйкăрӗн юбилейӗ – Ярославльте

Мероприятие космонавтăн тăван ялӗнчи Мемориал комплексӗн директорӗ Александр Тукмаков тата Чăваш патшалăх филармонийӗн артисчӗсем хутшăннă. 

Андриян Николаевăн уçлăхри çитӗнӗвӗсем этемлӗхшӗн питӗ пысăк пӗлтерӗшлӗ. Андриян Григорьевич уçлăха çӗкленнӗ виççӗмӗш космонавт, анчах вăл космосра уçнă çӗнӗлӗхсем çине пăхас-тăк, ăна чăннипех пӗрремӗш теме пулать. А.Николаев хыççăн уçлăха çӗкленекен ӗçтешӗсем чылай вăхăт усă курнă вӗсемпе. 

Тӗслӗхрен, космонавтика историйӗнче нумай вăхăт уçлăхра пулнă пӗрремӗш çын, радио- тата видеоçыхăнупа усă курса ушкăнпа вӗçекен космос карапӗсем («Восток-3» тата «Восток-4») çинче те пӗрремӗш. Космос карапне сыпăнтармасăр чи нумая тăсăлакан автономлă вӗçевре пулнă. Паллах, уçлăха çӗкленмессерен тата темӗн чухлӗ сăнавсем, тӗрӗслевсем ирттерме тӳр килнӗ космонавта. 

Курав чăннипех интереслӗ, уникаллă. «Космос» музейре пӗрремӗш хут А.Г.Николаевăн СССР летчик-космонавчӗн Мемориал комплексӗнчи экспонатсемпе документсене куракан умне тăратнă. Ентешӗмӗрӗн харпăр япалисем те пур куравра – китель, алла çыхмалли сехет, çар билечӗ. Асра юлмалли çак хаклă япаласене икӗ космонавтăн – Андриян Николаевпа Валентина Терешкова – хӗрӗ Елена Андрияновна Терешкова панă. Курав уçăлнă çӗрте вăл ашшӗпе çыхăннă асилӗвӗсене каласа панă. Летчик-космонавтăн Мемориал комплексӗн директорӗ Александр Тукмаков тата «Космос» В.В.Терешкова ячӗллӗ музейӗн заведующийӗ Игорь Зуб курава уçма пынисене Андриян Николаевăн пурнăçӗ çинчен каласа панă, экспонатсемпе тӗплӗнрех паллаштарнă.  

Александр Тукмаков Шуршăлти Мемориал комплексӗнче тума палăртнă космонавтика музейӗн çурчӗн проектне кăтартнă, реконструкци планӗпе паллаштарнă. Шутланисене пурнăçласан «Андриян сукмакӗ» туризмпа кану маршрутне уçассине пӗлтернӗ. 

Чăваш Республикинче Андриян Николаев 95 çул тултарнине халалласа ирттернӗ мероприятисене хутшăннисене курава уçнă çӗрте Раççейӗн радио юратакансен Союзӗн ЧР регион уйрăмӗн дипломӗсене тата А.Г.Николаев СССР летчик-космонавчӗн Мемориал комплексӗн Тав çырăвӗсене панă. 

Çак кун Андриян Николаевăн çемйинче типтерлӗн упранакан наградисене пӗр кунлăха курава тăратнă.   

Савăнăçлă мероприяти ЧР Патшалăх филармонийӗн тата ЯО филармонийӗн артисчӗсен концерчӗпе вӗçленнӗ. 

«Николаев. Сокол на орбите» курава уçнă çӗрте «Роскосмос» Патшалăх корпорацийӗн ӗçченӗ Денис Вотоновский, РФ Патшалăх Думин депутачӗн Валентина Терешкован пулăшуçи Кира Крайнова, Ярославль Патшалăх историпе архитектура тата ӳнер музей-заповедникӗн директорӗ Наталья Левицкая, Елена Терешкова Андрей Родионов мăшăрӗпе тата ыттисем пулнă.

Татьяна ВАСИЛЬЕВА.

Сăнӳкерчӗксем culture.cap.ru сайтран.