Çемье йăли-йӗрки объективра

Конкурса хутшăнни чăваш тата ытти халăхсен çемйисемшӗн питӗ пӗлтерӗшлӗ, вăл наци тумӗн илемлӗхне, юрăсемпе ташăсен хăйне евӗрлӗхне, чи кирли – ăрăвран ăрăва куçакан çемье çыхăнăвӗсен çирӗплӗхне пӗтӗм тӗнчене кăтартса парать. Кăçал вăл çиччӗмӗш хут иртет.

Конкурса Национальностьсен ӗçӗсен федераллă агентстви (ФАДН) пулăшнипе ирттереççӗ. Йӗркелӳ комитечӗ 2026 çулхи кăрлачăн 31-мӗшӗнче ӗçлеме пуçланă. 2026 çул, РФ Президенчӗн Указӗпе килӗшӳллӗн, Раççейре  Халăхӗсен пӗрлӗхӗн çулталăкӗ пек иртет. Конкурсăн тӗп тӗллевӗсем çак пӗлтерӗшлӗ пулăмпа килӗшсе тăраççӗ: этнокультура тӗрлӗ енлӗхне сыхласа хăварасси,  çемье хаклăхӗсене çирӗплетесси тата искусство урлă пӗрлӗхе кăтартасси.

Конкурс йӗркелӳçисем  виçӗ тӗп номинаци хатӗрленӗ:

• «Мама и дети в национальных костюмах» – тӗп номинаци. Ăрусен çыхăнăвне тата наци еткерӗн илемне уçса паракан сăнӳкерчӗксене ямалла. Кирек хăш ӳсӗмрисем те  хутшăнма пултараççӗ.
• «Конкурс национальной колыбельной песни» номинаципе хутшăнас тесен  сăпка юррине  тăван чӗлхепе юрласа видео ӳкермелле.
• «Конкурс национального танца» номинаци – пӗччен юрлакансемпе ташă коллективӗсем хăйсен хореографи номерӗсемпе паллаштарӗç.

Заявкăсене сентябрӗн 25-мӗшччен конкурсăн официаллă сайтӗнче йышăнаççӗ, октябрӗн 25-мӗшӗччен çӗнтерӳçӗсене палăртаççӗ. Лауреатсемпе çӗнтерӳçӗсен ӗçӗсене онлайн-галерейăра вырнаçтараççӗ.

Сăнӳкерчӗкре Шупашкарта пурăнакан Людмила Павлова пӗчӗк ывăлӗпе.