Тутарстанра 2025 çулта «Пурнӑçшăн инфраструктура» наци проекчӗ шайӗнче пӗтӗмӗшле 675 метр тӑршшӗ çӗнетнӗ 16 кӗпере хута янӑ. Кун пирки ТР Транспорт тата çул-йӗр министерствин пресс-служби пӗлтернӗ
Кăçал республикӑра пурӗ 23 объектра ӗçе тытăннă. Вӗсенчен çиччӗшӗнче (пӗтӗмӗшле тӑршшӗ 446 погон метр) 2026 çулта ӗç малалла тӑсӑлӗ.
Панӑ объектсен хушшинче – Менделеевск районӗнчи Камай ялӗнчи Возжайка шывӗ урлӑ хывнӑ кӗпер, Рыбно-Слободски районӗнчи Ямаш ялӗнчи Ачису шывӗ урлӑ хывнӑ кӗпер, çавӑн пекех Çарӑмсан районӗнчи «Лениногорск – Çарӑмсан» автоçул иртекен юханшыв урлӑ хывнӑ кӗпер.
Регионшăн пӗлтерӗшлӗ кӗперсене нормăра кăтартнă пек йӗркене кӗртесси çул-йӗр тăвакансен тӗллевӗ пулса тăрать. «Балтаси – Атня» трассӑри Арборка юппи урлӑ хывнӑ, «Мӑн Кайпăç – Камылово» çул çинчи Бирля шывӗ урлӑ хывнӑ кӗперсем пирки те çакнах каламалла. Вӗсене çӗнетни транспорт системине кал-кал ӗçлеме парать, шыв юхăмӗсем, çырма-çатра урлӑ пӗр чăрмавсăр çӳреме май парать.
ТР Транспорт тата çул-йӗр министерствин автомобиль çулӗсен управленийӗн пуçлӑхӗ Карим Нурмухаметов çак мерӑсем регионӑн çул-йӗр инфраструктурине лайӑхлатнине, халӑхӑн пурнӑç пахалӑхне ӳстернине тата наци проекчӗн тӗллевлӗ кӑтартӑвӗсене пурнӑçлама пулӑшнине палăртнă.
Сăнӳкерчӗк mindortrans.tatarstan.ru сайтран
Нет комментариев