Чӗрери сурана сипленипе танах

Акцие Ватăсен кунӗ тӗлне ирттерсе салтак амăшӗсене халаллаççӗ. Кăçал акă тулă, кучченеç валеçрӗç. Аса илтеретпӗр, кун пек акци хальлӗхе республикăн пӗр районӗнче те çук-ха. 

– Районти хресченпе фермер хуçалăхӗсен, ял хутлăхӗсен пуçлăхӗсене пулăшу панăшăн пурне те тав тăвас килет. Ку акципе эпир Тăван çӗршывăн тӗрлӗ ӳсӗмри паттăрӗсене сума сунине кăтартатпăр. «Тăванел сачӗсем» хуçалăхăн ертӳçине Альфред Хайруллина пысăк тав. Афган, Чечня тата СВОра пуç хунă кашни салтакăн ашшӗ-амăшне 5-шер килограмм панулми пачӗ. Наиля Нуруллова та нихăш çул та ку акцирен юлмасть. Хăйӗн пӗчӗк пенсийӗнчен салтак амăшӗсем валли парне хатӗрлет. Хресченпе фермер хуçалăхӗн ертӳçине Владимир Анатольевич Лысова уйрăммăн палăртса хăварас килет. Пӗлтӗр 10 тонна урпа уйăрнăччӗ вăл, кăçал та пулăшу пачӗ. Кунсăр пуçне бадминтон ăмăртăвне ирттерме укçа-тенкӗпе пулăшать. Ветерансен канашне пăшалтан перессипе ăмăрту валли кубок туянса пачӗ. Ятарлă çар операцийӗнчи салтак-ентешсем валли гуманитари пулăшăвӗ пухма та пӗрре мар пулăшрӗ. Ырă туни темиçе хут ырăпах таврăнтăр ку çынсене. Хуçалăхсен пӳлмисем килес çул та тырăпа тулччăр, – терӗ Виктор Петрович çак акцие ирттерме пулăшнисене пурне те ветерансен ятӗнчен тав туса.

Ветерансен пулăшăвӗ, тен, пысăк та мар-тăр, анчах япали мар, Тăван çӗршывăн интересӗсене хӳтӗлесе пуç хунă ывăлӗсене манманни темрен те хаклă-çке салтак амăшӗсемшӗн, чӗрери пирчемен сурана сипленипе танах.

Ирина КУЗЬМИНА.
В.Петухов архивӗнчи сăнӳкерчӗксем.