Çул-йӗр çинчи инкеке ачасем нумай чухне хăйсен тимсӗрлӗхне пула лекеççӗ

Статистика савăнмаллиех мар: кăçал çулсем çинче 2 ачан ӗмӗрӗ вăхăтсăр татăлнă пирӗн,111-шӗ аманнă. Патшалăх автоинспекцине республикăра транспорт хатӗрӗсене çӳретекен ачасем аварие лекнӗ тӗслӗхсем нумайланни те сисчӗвлентерет. Çавăнпа Дамир Бикмухаметов транспорт хатӗрӗсен уççисене ачасен алли айне хумалла марри пирки ашшӗ-амăшӗсене асăрхаттарма ыйтрӗ.

Енчен те çул çитмен ача право йӗркине пăсать-тӗк, кун çинчен хыпара Çул çитменнисен ӗçӗсемпе вӗсен правине хӳтӗлессипе ӗçлекен комиссие çитереççӗ. Кун пек ачана вăхăтра профилактика учетне илни ăна тӳрӗ çултан пăрăнма памасть, ашшӗ-амăшӗн яваплăхне те ӳстерет. Çулсем çинче хăйне мӗнле тытмалли пирки те акă ачана чăн малтан ашшӗ-амăшӗн ăнлантармалла.

Ашшӗ-амăшӗ тенӗрен, вӗсем, шел те, тӗрлӗрен. Ачисем çӗрле ăçта çӳренине пӗлес теменнисем те пур. Аса илтеретпӗр, Тутарстан Республикин территорийӗнче 2010 çултанпа 71№ закон вăйра. Унпа килӗшӳллӗн, 18 çула çитмен ачасем çулла – 22.00, хӗлле 23.00 сехетрен обществăлла вырăнта аслисемсӗр çӳреме юрамасть. Шел, «комендант вăхăтне» пăхăнман ачасем тупăнаççех. Асăрхаттаратпăр, кун пеккисен енӗпе преступлени тума е усал шухăшлисем хăйсене преступлени тума явăçтарас хăрушлăх яланах пысăк. (Автор сăнӳкерчӗкӗ).