«Экият» Пукане театрӗнче аксусем хăйсен пултарулăхне кăтартрӗç

Театра кӗнӗ çӗрте районăн историйӗпе, политикăра, культурăра, экономикăра пысăк çитӗнӳсем тунă ентешӗсемпе те кӗскен паллашма пулать: Хасан Туфан, Михаил Сениэль поэтсем, «Экият» пукане театрӗн режиссерӗ Ильгиз Зайниев, Çырчаллинче КАМАЗ историне пуçлакансенчен пӗри, политик, çӗршывра лару-тăру йывăрланнă вăхăтра Хусанти патшалăх культурăпа искусство институтне ертсе пынă Раис Беляев, пӗрремӗш Чăваш халăх поэчӗн Николай Полоруссов-Шелепи портречӗсем патне чарăнса тăрсах биографийӗсемпе паллашаççӗ культура кунне килнисем.

Çакăнтах районти фермерсен çимӗçӗсене туянма пулать. Иван Шугаев ертсе пыракан «Актай» агрофирмăн çитӗнӗвӗсене сӗтел çинчи тухăçсенчен пӗлме пулать.

Паян туризм республикăн кашни кӗтесӗнче аталанать. Аксу пирки те çакнах каламалла. Ку тăрăхра 185 археологи палăкӗ – хулашсем, пăлхарсен тапхăрӗнчи палăксем, вилтăпри çине хунă чулсем...

Ятарлă çар операцине хутшăнакан ентешӗсене пулăшасси Аксу тăрăхӗнче 2022 çултанпах пырать. Фронта кирлӗ япаласене куллен хатӗрлеççӗ, пуçтараççӗ вӗсем. Хусанта улма-çырла консервисем, пыл сутса тунă укçа-тенке те çак тӗллевпех тăкаклӗç. Маскировка сеткисем çыхасси те Аксу тăрăхӗнче 2022 çултах пуçланнă. Тӗрлӗ калăпăшпе çыхаççӗ вӗсене, салтаксем танк е машина хупламалăх пултăр тесе ятарлă заказ тăваççӗ. 195*195 тăваткал метр çыхнисем те пулнă тесе каласа парать волонтерсен ертӳçи Рамзия Паймулкина. Вӗсем çыхнă сетьсен пӗтӗмӗшле лаптăкӗ 36610 тăваткал метра çитнӗ халиччен. Валерий Сидоркин (юлташӗсем ăна ачашшăн «пирӗн кулибин» теççӗ) пусмана çуракан ятарлă станок туса кăларнă хыççăн ӗç хăвăртлăхӗ самай ӳснӗ.  

Фойен икӗ хутне Аксу ӗçченӗсем йышăннă. Несӗлсен историне каласа паракансем те пур  кунта, ытларах ал ӗçӗ тума вӗрентекенсем: ӳкерме вӗрентеççӗ (район центрӗнчи искусство шкулӗ питӗ вăйлă аталаннă), Маринăпа Андрей Бикмуллинсем тăмран кăкшăм тума та вӗрентеççӗ, йывăçран каскаласа илемлӗ япаласем ăсталассипе те кирлӗ канашсем параççӗ. Юнашарах историре юлнă ал арманӗпе кӗрпе çурма пулать. 

Хирӗçех Максим Гаевский сӗтелӗ çинчи савăтсенче кăсăк япаласем куртăмăр. Сăнасарах пăхсан: пӗринче – шăнасем иккен, аха, ятне те çырнă, тепринче –вӗсен çăмартисем тата тепӗр савăтра комбикорм. Максим Сергеевич ертсе пыракан фирма Хусанти Технопаркра вырнаçнă. Коллектив шăна ӗрчетсе çăмартинчен комбикорм тăвассипе ӗçлет, аксусене çӗнӗ продукта ӗçре усă курма сӗнет М.Гаевский. Ку комбикормра белок шайӗ пысăк пулнипе мăйракаллă шултра выльăха, сыснасене пама сӗнет вăл (хакӗпе интересленмерӗмӗр).

Фойере авалтан пыракан йăлапа тум-юм çӗленинчен юлнă татăксенчен пукане çӗлессипе мастер-классем ирттерчӗç. Хальхилле каласан, саше-оберег хатӗрлерӗç вӗсем – ăшне пӗтнӗк хурса çыхрӗç.

Урамра, фойере питӗ кăсăк пулсан та чи интересли сцена çинче пулчӗ. Аксу районӗнчен килнисене, Хусанта пурăнакан ентешӗсене ТР Патшалăх Канашӗн депутачӗ Камиль Гилманов, Раççей Геройӗ Расим Баксиков, ТР культура министрӗн çумӗ Ленар Хакимзянов тата Аксу муниципаллă районӗн Ӗçтăвкомӗн ертӳçи Алмаз Мингулов сцена çинчен саламларӗç. 

Районта чăваш, тутар, вырăс халăхӗсем туслăн пурăнаççӗ. Çакă концерт программинче те палăрчӗ. Этем пурнăçӗнчи пулăмсене вӗсем питӗ килӗшӳллӗн кăтартса пачӗç. Тутар халăх йăлипе çемьене çӗнӗ кайăк килнине – ача çуралса ят панине, чăвашсен йӗркипе çула çитнӗ яша çара ăсатнине, вырăссен йӗркипе хӗр çураçса туй тунине юрă-ташăпа, шӳтсемпе кăтартнине куракансем кăмăлласа йышăнчӗç. 

Çӗршыв хӳтӗлевçисене халалланă, мирлӗ пурнăçа ырласа çырнă юрăсем те янăрарӗç концертра.

Автор сăнӳкерчӗкӗ.

Ытти сăнӳкерчӗксем.