ЕНТЕШ ЧАПӖ ӖМӖРЛӖХЕ

Çитӗнекен ӑрура патриотизм туйăмне вăйлатас, ачасене Тӑван çӗршыва хисеплеме тата юратма, граждан тивӗçне пурнӑçлама хатӗрлес тӗллевпе, оборонӑпа массӑллӑ тата çарпа патриотизм ӗçӗсен уйăхлӑхӗн шайӗнче кӑрлачӑн 24-мӗшӗнче П.В.Дементьев музейӗнче «Ӑшӑ çурт» социаллӑ приютра воспитани илекенсем хутшăннипе ентешӗмӗр, Социализмла Ӗç Геройӗ çуралнӑранпа 115 çул çитнине халалласа  «П.В.Дементьев – авиапром мухтавӗ» паттӑрлӑх урокӗ иртрӗ.
Урокра ачасем Петр Дементье­вӑн ачалăхӗпе, студент çу­лӗсемпе, тӑванӗсемпе çывӑх çын­нисем, тӑван çӗршывӗпе çы­хӑ­нӑвӗсем çинчен, авиаци предприятийӗ­сенче тата СССР Авиаци промышленноçӗн министерствине ертсе пынӑ тапхăрӗпе, сумлӑ наградисемпе паллашрӗç.
Занятире ачасем хутран самолетсем туса хатӗрлерӗç, инçете вӗçес тӗлӗшпе сӑнав ирттерчӗç. Çавăн пекех «Петр Дементьев: йывӑрлӑхсене па­рӑнтарни» документлӑ фильм пӑхрӗç.
Социаллă приют ачисене «Мухтавлӑ çын» тематикăлла куравпа паллашма та интереслӗ пулчӗ: унта сӑнӳкерчӗксемпе документсем, Петр Василье­вич çинчен хаçат-журналтан касса илнӗ статьясем пур.
Паян тӗрлӗ ӳсӗмрисемшӗн пӗтӗм майсем пур: вӗренме те, канма та, сывлӑха çирӗплетме те спорт залӗсем ӗçлесе тӑраççӗ. Шанас килет, тӑрӑшса вӗренсен, атте-аннене хисеп­лесен, аслисен сӑмахне итлесен  ентешӗн тӗслӗхӗпе малашне те паттӑрсем çитӗнӗç.

Юрий АДЪЮТАНТОВ.
Автор сăнӳкерчӗкӗ.