Эпир пӗрле

Раштав уйăхӗн 8-мӗшӗнче Анат Камăри И.Х.Садыков ячӗллӗ Ача-пăчапа çамрăксен пултарулăхӗн керменӗнче «Эпир пӗрле! Мы вместе! Без бергэ!» пултарулăх каçӗ иртрӗ. 

Ку мероприяти Раççейри Педагог тата вӗрентекен çулталăкне пӗтӗмлетекен праçник пулчӗ. Уява килекенсем чăваш халăхӗн историйӗпе, йăли-йӗркипе паллашрӗç: 34-мӗш номерлӗ гимназире 7-мӗш класра вӗренекенсем тата хулари «Тамаша» халăх театрӗн артисчӗсем салтак ăсатнин, Çăварни уявӗн илемне сцена çинче питӗ интереслӗ кăтартса пачӗç. Çавăн пекех дефиле те ирт­рӗ: чăвашсен авалхи тата хальхи вăхăтри сцена тумӗпе шкул ачисем паллаштарчӗç.

Анат Камăри 75-мӗш ача садне çӳрекен ачасем те пуçласа сцена çине «Тух-ха, Ванюк» юрăпа тухрӗç, куракансене калама çук савăнтарчӗç. Ачасене хатӗрлекенӗсем: Лариса Ивановна Петрунина –воспитательница, Айгюль Виловна Шарифуллина – музыка ертӳçи, Светлана Сергеевна Костина – аслă воспитатель.

Сивӗ çанталăка пăхмасăрах куракансем залра йышлăн пуçта­рăнчӗç. Çавăн пекех фойе­ре куравпа ярмăркка та йӗркеленӗччӗ. Ярмăрккăра япаласем сутса пухнă укçана ыркăмăллăх ӗçӗсем валли ярӗç йӗркелӳçӗсем.

Людмила ИЛЬГУЗИНА.

Автор сăнӳкерчӗкӗ.