Иван кунӗнче юр çусан – ака уйăхӗнче те çăвать

Пуш уйăхӗн 10-мӗшӗ – Тарас. Хура кураксем вӗçсе килсе йăва çавăрма пуçланă-тăк – кӗçех çанталăк лайăхланать. Юр çăвать-тӗк – Мăнкун эрни сивӗ пулать. Çак кун тултан чӳрече витӗр пӳртелле пăхма хушмаççӗ.

Пушăн 11-мӗшӗ – Порфирий. Енчен те вӗсем кăнтăртан таврăннă – тыр-пул ăнса пулать. Каçхи тӳпе таса, çăлтăрлă – çулла шăрăх та аслатиллӗ пулать.

Пушăн 12-мӗшӗ – Прокоп. Хресченсем кăчкăллă хăвана сăнаççӗ: енчен те унăн кăчкисем тăрринче çурăлма пуçлаççӗ – акана иртерех тухма юрать. Çак кун çумăр çусан – çулла çумăрлă пулать.

Пушăн 13-мӗшӗ – Василий. Пӳрт-хуралтă тăррисенче юр ирӗлсе тумлама пуçлать. Çумăр çуни аван паллă – çулла савăнтарать.

Пушăн 14-мӗшӗ – Евдокия, Авдотья. Çак кун тӗлне чӗрчунсенчен нумайăшӗ хӗл ыйхинчен вăранать. Юр ирӗлтерсе тунă шыв ку кун уйрăмах сиплӗ теççӗ. Кунӗ уяр-тăк – çулла та уяр çанталăкпа савăнтарӗ. Çак кун туяннă япала вăраха чăтмасть тет.

Пушăн 15-мӗшӗ – Федот. Çак кун ăшă çил вӗрсен çулла ăшă пулать. Çумăр çăвать – çулла йӗпе-сапаллă çанталăк тарăхтарӗ. Енчен те шартлама сивӗ-тӗк – утăçире типӗ пуласса ан кӗт.