Кăмпа сахал, мăйăр нумай-тăк – хӗл кăра пулать

• Юпа уйăхӗн 7-мӗшӗ – Фекла. Аслати авăтсан хӗлле ăшă тата сахал юрлă пулать. Юман çинче йӗкел нумаййи те хӗл ăшă, çулла тухăçлă пулнине кăтартакан паллă. 

• Юпа уйăхӗн 8-мӗшӗ – Сергий Радонежский. Çак кун пуçласа юр çусан Михайла кунӗнче (ноябрӗн 21-мӗшӗ) хӗл ларать. Юпан 8-мӗшӗ мӗнле – ака уйă­хӗн 8-мӗшӗ те çапла. Пуçласа типӗ юр çусан çулла тухăçлă пулать. Лайăх çанталăк тăрать-тӗк – тата виçӗ эрне çапла пулать.  

• Юпа уйăхӗн 9-мӗшӗ – ­Иоанн Богослов. Çак кун юр çусан 40 кунран хӗл ларать. Çумăр çусан – тепӗр икӗ эрне йӗпе-сапаллă çанталăк тăрать. Çулçăсем хăвăрт ӳксе пӗтни – хӗл сивӗ пуласса пӗлтерекен паллă.

• Юпа уйăхӗн 10-мӗшӗ – Савватий. Типӗ пулсан хӗл час лармасть-ха. Çак кун аслати авăтсан хӗл юрсăр, кӗске тата ăшă пулать. Хырсемпе чăрăшсем çинче йӗкел сахал пулсан хӗл сивӗ пулмӗ. 

• Юпа уйăхӗн 11-мӗшӗ – Илья Муромец. Йывăçсем çинчен ӳкнӗ çулçăсенчен ытларахăшӗ тӳнтер енӗпе çӳлелле выртаççӗ – çитес çул аван тухăç пулать. Çил çак кун çурçӗртен вӗрсен – хӗл хаяр, анăçран – юрлă, кăнтăртан вӗрсен çемçе пулать. Мулкачсем сăрă кӗрӗкне шуррипе улăштарма васкамаççӗ-тӗк – кӗркунне вăраха тăсăлать. 

• Юпа уйăхӗн 12-мӗшӗ – Марьямна. Тӳпере çăлтăр нумай-тăк – кӗр кунӗсем типӗ пулаççӗ. Кая юлса тухакан кăмпасем шăтнă пулсан – юр часах çумасть-ха. Çак кун аслати авăтсан хӗлле сахал юр çăвать.