Кофе, чей, шыв. Сывлӑхшӑн усăллă пултăр тесен мӗн чухлӗ ӗçмелле?

Чӗре чирӗсенчен сыхланас тесен 3 курка кофепе 2курка чей ӗҫмелле. Кунне ҫичӗ-сакӑр курка кофе, чей тата шыв ӗҫни чӗрепе юн тымарӗсен тата онкологи чирӗсем аталанассине чакарать. Ҫакăн çинчен Британире тухса тăракан апатлану журналӗнче çырнă.

 13 ҫул хушши ӑсчахсем 183 пин ҫыннӑн сывлӑхӗпе апатланӑвне тишкернӗ. Кунне «икӗ курка чейпе виҫӗ курка кофе» ӗçекенсен сывлăхӗ ыттиснчен çирӗпрех пулнине асăрханă сăнавçăсем. Ҫак ушкăнри çынсем тăтăшах ахаль шыв та ӗçнӗ.

Тӗпчевçӗсен сăмахӗпе, кофери хлороген йӳҫекӗ диабетпа чирлес тата нерв системи пӑсӑлас хӑрушлӑха чакарать. Ҫавӑн пекех вăл пыршӑлӑх микрофлорине пӗр шайра тытса тӑрать. Чейри катехинсем шыҫӑсемпе «кӗрешеççӗ» тата антиоксидантсене вăйлатаççӗ, ҫакӑ юн тымарӗсемпе тӗртӗмсене сиенленесрен сыхлама пулӑшать.

Ӳпке чирӗсенчен хӳтӗлесси 72 процент ӳсет, вар-хырăм чирӗсенчен – 65 процент.

Ăсчахсем  аса илтереççӗ: кунне виҫӗ е ытларах курка кофе ӗçекенсем ыйхӑ килменнипе, чӗре таппи улшăннипе аптрама пултараççӗ.

Организма кирлинчен ытларах шыв ӗçни электролит шайне пӑсма пултарнине те асăрхаттарнă.