Кун уяр та ăшă – кӗркунне вăраха тăсăлать

• Авăн уйăхӗн 16-мӗшӗ – Василиса. Çак кун çумăр çăвать-тӗк эрнипех йӗпе-сапа пулӗ. Ку кун çуралнă çын мăнкăмăллă, чыса юратать, хăйӗн тӗллевне пурнăçлас тесе вăйне те, вăхăтне те шеллемест. Вăрманта йӗкел нумай пулни хӗл хаяр пулмасса пӗлтерет. 

• Авăн уйăхӗн 17-мӗшӗ – Лука. Сухан хуппи нумай сийлӗ-тӗк – хӗлле сивӗ пулать. Катрам пӗлӗтсем – кӗçех сивӗтессе. Çак кун укçа кивçен илмеççӗ.

• Авăн уйăхӗн 18-мӗшӗ – Елизавета тата Захарий. Ир çинчен пӗлӗтсем хӗрлӗн курăнаççӗ-тӗк – çумăра. Çак кун пултаруллă çынсем, тӗпчевçӗсем çуралаççӗ. 

• Авăн уйăхӗн 19-мӗшӗ – Михаил. Кун уяр та ăшă – кӗркунне вăраха тăсăлать. Чăрăш çинче йӗкел сахал-тăк – хӗл ăшă та кӗске пулӗ. 

• Авăн уйăхӗн 20-мӗшӗ – Созонт. Хыр-чăрăшăн йӗкелӗсем аялта йышлă – хӗл хăвăрт ларасса тата сивӗ пуласса. Çак кун çуралнисен сиплес ăсталăх пур, анчах пурте тухтăр профессине суйламаççӗ вӗсем. 

• Авăн уйăхӗн 21-мӗшӗ – Турă Амăшӗ çуралнă кун. Çанталăк мӗнле – кӗркунне те тӗпрен илсен çапла пулать. Çак кун çуралнисен сисӗмӗ вăйлă, çӗннине пӗлме юратаççӗ. Ал ӗç тума, алла йӗппе çип тытма юрамасть.

В.Александрова сăнӳкерчӗкӗ.