Михаил Ефремов 60 çулта

Паян паллă кино тата театр артисчӗн, чăвашсен çутта кăлараканӗн кӗçӗн-кӗçӗн мăнукӗ Михаил Ефремов 60 çул тултарать. Михаил Олегович театр артисчӗсен çемйинче çуралнă – ашшӗ Олег Ефремов паллă кино тата театр артисчӗ çеç мар, театр искусствин атланăвне те тӳпе кӗртнӗ. Михаил Ефремовăн амăшӗ Алла Покровскаян та çуралнăранпах пурнăçӗ театрпа çыхăннă. Михаил хăй те МХАТ сцени çине ачаллах тухнă, кинора та ир ӳкерӗнме пуçланă – «Дни хирурга Мишкина» фильмра ӳкерӗннӗ чух шкулта вӗреннӗ.

Вăл ăсталакан сăнарсем яланах асра юлмалла интереслӗ, кăсăк харакатерлă. Куракансем унăн геройӗсене (театрта-и, кинора-и) пурне те юратса пăхнă тесен йăнăшмастпăр.

Михаил Олегович кинора тата театрта 150 роль ăсталанă. Телекăларăмсене те ертсе пынă, сценарисем те çырнă, поэзи проектчӗсемпе гастрольсене çӳренӗ.

Халăх çине тухассипе çыхăннă ӗçсенчи çынсене шăпа эрех-сăрапа тӗрӗслени вăрттăнлăх мар. Тепре чух темӗнле пултаруллă çынсене те çак тӗрӗслев такăнтарать. Михаил Олеговича та çаках инкек патне çитерчӗ ӗнтӗ.

Артист пултарулăхне юратакансен шанмаллах, юбиляр çакăн пек лару-тăруран чыслăн тухса искусствăра çитӗнӳсем тăватех.

Сăнӳкерчӗк «Татар-информ» ИА.