ПӖЛМЕ ИНТЕРЕСЛӖ ПУЛЧӖ

Наратлă ялӗн библиотекинче Чăваш чӗлхи кунӗнче «Яковлев – çӗнӗ çырулăха пуçаракан» информаци сехечӗ иртрӗ. Паллах, ку мероприятие чăваш халăхне çутта кăларнă И.Я.Яковлев çуралнăранпа 175 çул çитнине халалланă. 

Ертсе пыракансем ачасене Иван Яковлевичăн çăмăл мар пурнăçӗ, ӗçӗ-хӗлӗ çинчен каласа пачӗç. Тӗлпулăва хутшăнакансене тăлăх ача мӗн пӗчӗкрен вӗренес тесе тăрăшнине пӗлме интереслӗ пулчӗ. Иван Яковлев ырми-канми ӗçленипе чăваш халăхӗн хăйӗн алфавичӗ йӗркеленнӗ, чăвашла кӗнекесем пичетленме пуçланă. 

Шкул ачисем Иван Яковлев çинчен, чăваш чӗлхи пирки сăвăсем вуларӗç. Юлашкинчен пурте пӗрле «И.Я.Яковлев – Аслă Вӗрентекенӗмӗр» кӗнеке куравӗпе паллашрӗç. 

Татьяна ДМИТРИЕВА.

Пӗкӗлме районӗ,

Наратлă.

Автор сăнӳкерчӗкӗ.