Пухăва питӗ çӳллӗ шайра хатӗрлесе ирттерчӗç

Унта делегатсем 24 регионран килсе çитрӗç, кашнийӗнчен пӗрер. Ыттисем хăнасем. Палăртса хăвармалла, Раççейри облаçсемпе республикăсенче официаллă майпа регионри общество организацийӗ тесе регистрациленнӗ чăваш наципе культура автономийӗсем çеç хутшăнса сасăлама пултарчӗç съездра.

Тутарстанран федераллă наципе культура автономийӗн пухăвне ТР ЧНКА Канашӗн Председателӗн çумӗ Константин Малышев делегат пулса хутшăнчӗ. Пухăннисене ЧР Пуçлăхӗ Олег Николаев, РФ Патшалăх Думин депутачӗ Анатолий Аксаков саламларӗç, вӗсем съезд ӗçне те хастар хутшăнчӗç. Залра РФ Патшалăх Думин депутачӗ Сергей Казанков та, чăваш халăх поэчӗ Валери Туркай та, ытти хисеплӗ чăвашсем те пурччӗ.

Съезд автономи тилхепине 7 çул тытса пынă Леонид Черкесовăн отчет докладне итлерӗ, ревизи комиссийӗн пӗтӗмлетӗвне йышăнчӗ, организацин çӗнетнӗ уставне çирӗплетрӗ, РЧФНКАна йышăнас, унăн Канашне суйлас йӗркене пăхса тухрӗ. Унта 19 çын кӗчӗç. Çав шутра Ульяновск облаçӗнчен Владимир Бабайкин, Пушкăртстан Республикинчен Владимир Матвеев, Тутарстанран Константин Малышев, Оренбург облаçӗнчен Петр Семенов, Самар облаçӗнчен Людмила Павлова, Чăваш Республикинчен Владимир Тяпкин, Ленинград облаçӗнчен Валерьян Гаврилов тата ыттисем. Канаш хăй ӗçне ытларах Мускавра илсе пырассине шута илсе унта мускавсене ытларах кӗртрӗç: Владимир Бурмистров, Владимир Сильвестров, Анатолий Григорьев, Олег Захаров, Иван Николаев, Алексей Ладыков, Дмитрий Арсютов, Игорь Семенов, Николай Гаврилов, Сергей Корнилаев, Анатолий Аксаков.  

Пренисенче Санкт-Петербург делагацийӗ çамрăксене наципе культура ӗçне явăçтарасси çине пусăм тума чӗнсе каларӗ, Тутарстан делегацийӗ чăваш культурин «Уяв» праçникне пӗтӗмраççейри статуса пама сӗнчӗ, Пушкăртстан делегачӗсем Канаша ытларахăн кӗресшӗн пулчӗç. Анчах та съезд хăйӗн йышăнăвне улăштармарӗ.

Çӗршывӗпе паллă чăваш летчикӗ, Раççей Паттăрӗ Николай Федорович Гаврилов пирки уйрăммăн каламалла. Çак çынна съезд пӗр саслăн пулса федераллă автономие малалла ертсе пыма суйларӗ. Унăн çумӗсем Алексей Ладыков, Анатолий Аксаков, Константин Малышев пулӗç.
Çавăн пекех Канаш ларăвӗнче автономин ӗç тăванкан директорне суйларӗç. Унăн тивӗçӗсене Игорь Семенов пурнăçласа пырӗ.