Шупашкар аэропорчӗ космонавт ячӗллӗ пулӗ

Шупашкар аэропорчӗ Андриян Николаев летчик-космонавт ячӗпе хисепленсе тăрӗ. «Великие имена России» проекта хутшăнакансем уншăн 36650 сасă панă. Кунтан тӗлӗнме кирлӗ мар-тăр, Николаев ячӗ авиаципе çыхăннă, космоса çӗкленнӗ чăваш ӗмӗрлӗхех пирӗн халăх мăнаçлăхӗ пулса юлӗ.

Чулхуласем те Стригинори сывлăш гаваньне хăйсен ентешӗн летчик-испытателӗн Валерий Чкаловăн ятне панă. Сăмах май, Совет Союзӗн Паттăрӗ 1937 çӗршывăн Верховнăй Канашӗн депутачӗ пулма Чăваш Республикинчен суйланнă.

Тутарстанпа Пушкăртстанра вара литература ӗçченӗсем мала тухнă. Хусан аэропорчӗ  Габдулла Тукай ячӗллӗ пулӗ, Ӗпхӗвӗн – Мустай Карим.