СВОри салтаксем валли оргтехника

Черетлӗ пулӑшу пирки пирӗн ентеш, СВО пуҫланнӑ кунранах салтаксем валли гуманитари пулӑшӑвӗ пухса леҫекен ҫар ветеранӗ, Ҫӗпрел районӗнчи Упи ял чӑвашӗ Владимир Егорович Ярухин пӗлтерчӗ.
"Ентеш-салтаксене ку оргтехникӑпа канцеляри таварӗсем штабра хут ӗҫӗсене илсе пыма кирлӗ. Вӗсем мӗн ыйтнине хӑвӑрт тупса ӑсатма тӑрӑшатпӑр. Хальхинче оргтехника туянма Екатерина Геннадьевна К. пулӑшрӗ. Пысӑк тав ӑна",- терӗ.
Аса илтеретпӗр, Ульяновскри ҫар ветеранӗсен пӗрлешӗвӗ (унта Тутарстанра ҫуралса ӳснисем йышлӑн) Ульяновск хулипе облаҫӗн кӑна мар, Тутарстанпа Чӑваш Ен тата Хакаси республикисенчи волонтерсемпе те тачӑ ҫыхӑнса ӗҫлет, СВО пуҫланнӑ пӗрремӗш кунранах  гуманитари пулӑшӑвне хамӑр атьсем патне  леҫет.
Чӗретлӗ 56-мӗш гуманитари конвойӗ вӗсен ноябрӗн 11-мӗшӗнче ҫула тухрӗ пулсан, 57-мӗшӗ ноябрӗн 14-мӗшӗнче. Хальхинче салтаксем валли маскировка сеткисемпе (Хакаси Республикинчи Саяногорск хулин кӗмӗл волонтерӗсем Энергия транспорт компанийӗ урлӑ пысӑк парти парса янӑ) куллен кирлӗ хатӗрсем, апат-ҫимӗҫ, хутса ӑшӑнмалли хатӗрсем, генераторсем, окоп ҫуртисем тата строительство материалӗсемпе инструментсем ӑсатрӗҫ. Ҫакӑн пек пысӑк пулӑшу панӑшӑн ветерансем Руслан Эфендиев, Юрий Сапов ыркӑмӑллӑхҫӑсене, "Александрит " тулли мар яваплӑ обществӑн ӗҫченӗсене, уйрӑмах ертӳҫине Александр Высочкина тата Ульяновск облаҫӗнчи Чӑнлӑ район халӑхне тав тӑваҫҫӗ.