«ТАТМЕДИА» акционерла обществăна шупашкарсем килсе çитрӗç

Паян пирӗн патра хăнасем! Шупашкартан ЧР цифра аталанăвӗн, информаци политикипе массăлла коммуникацисен министрӗн çумӗ Анна Иванова, «Хыпар» издательство çурчӗн генеральнăй директорӗ тата «Хыпар» хаçат тӗп редакторӗ Татьяна Вашуркина, унăн çумӗ, паллă çыравçă Дмитрий Моисеев килсе çитрӗç. Хăнасене «ТАТМЕДИА» акционерлă обществăн генеральнăй директорӗ Шамиль Садыков, социаллă медиа директор Алсу Исмагилова кӗтсе илчӗç.

Шупашкарсем кӗскен хăйсен ӗçӗпе паллаштарчӗç, унтан Тутарстанра тухса тăракан хаçатсене хак пачӗç. Вӗсем республикăра пурӗ 5 кăларăм. «Сувар» республика хаçачӗ тата Аксу, Нурлат, Пăвапа Çӗпрел районӗсенчи чăвашла дубляжсем. Пӗтӗмӗшле илсен, шупашкарсем пирӗн хаçатсене лайăх хак пачӗç.

«Сувар» хаçата пăхсах тăратăп. Унта профессилле журналистсем ӗçлеççӗ, материалӗсем çӳлти шайра. Тӗрӗссипе, паянхи тӗлпулу вӗрентнипе мар, пӗр-пӗрин опычăпе ылмашни пулса тухать», – терӗ Татьяна Вашуркина.

Дмитрий Моисеев тӗплӗнрех районта тухса тăракан хаçатсем çинче чарăнчӗ, куçару ӗçӗнче лайăх канашсем пачӗ.

Анна Иванова пӗлтернӗ тăрăх, вӗсене «ТАТМЕДИА» опычӗ интереслентерет. Вӗсем Чăваш Республикинче тухса тăракан хаçат-журналсене медиа-холдинг туса хурса пӗрле пуçтарасшăн. Çавăнпа кӳршисен администраципе хуçалăх тата коммерципе финанс ӗçӗсем ытларах интереслентерчӗç. Пуçлăхсен сӳтсе явмалли пайтах пулчӗ. Шупашкарсем хăйсене кăмăллă кӗтсе илнӗшӗн тав турӗç, пире те хăнана чӗнсе хăварчӗç. Мӗнех тейӗн, ырă кӳршӗ – çур пурнăç, çапла калаççӗ ваттисем.  

А.Исмагилова тата автор сăнӳкерчӗкӗсем.