«Тӗрӗ тӗрлетпӗр çемьепе»: сăнӳкерчӗксен конкурсӗ
Хаклă вулаканăмăрсем! Кăçал Раççейре Çемье çулталăкӗ. 2024 çул пуçланнăранпах пур çӗрте те мӗнле мероприяти ирттерсен те ăна Çемье çулталăкне халаллаççӗ. «Сувар» хаçат та кашни номертех материалсем пичетлет, пулса иртекен мероприятисене çутатсах тăрать. Ача садне çӳрекен тата шкулта вӗренекен ачасен хушшинче «Манăн çемье» ӳкерчӗксен конкурсне те ирттертӗмӗр, çывăх вăхăтра ун çӗнтерӳçисемпе паллаштарăпăр.
Çемье çулталăкӗ вӗçлениччен вара тата тăватă уйăх ытла-ха. Çавăнпа та редакци çак паллă пулăма халалласа тепӗр конкурс ирттерме шут тытрӗ. Ку сăнӳкерчӗксен конкурсӗ пулӗ, ăна «Тӗрӗ тӗрлетпӗр çемьепе» (Вышиваем всей семьей) ят парас терӗмӗр. Конкурс ятне пăхсан сăнӳкерчӗкре тӗрӗ тӗрлекенсем пулмалла пек. Çук. Конкурса хутшăнакан сăнӳкерчӗкре чи кирли – унта наци тумӗ тăхăннă çемье (тулли йышпа пулмасан та юрать) пулмалла. Паллах, чăваш наци тумӗпе кăна мар, тӗрлӗ халăх тумне тăхăнса фото ӳкерӗнсен те юрать. Чи-чи креативлă сăнӳкерчӗк авторӗсене редакци конкурса пӗтӗмлетсен парнепе чыслӗ. Конкурса ачасем те, аслисем те хутшăнма пултараççӗ.
Конкурс комиссийӗ чи интереслӗ сăнӳкерчӗксене суйласа илсе Гран-при, 1-мӗш, 2-мӗш тата 3-мӗш вырăнсем палăртать конкурса хутшăнакансен хушшинче. Сăнӳкерчӗксене хаçатăн 12-мӗш страницинче пичетлетпӗр, çавăн пекех редакцин социаллă сетьсенчи ушкăнӗсенче кăларатпăр. Конкурса 2024 çулхи декабрь уйăхӗнче пӗтӗмлететпӗр.
Сăнӳкерчӗксене «Тӗрӗ тӗрлетпӗр çемьепе» фотоконкурса» тесе палăртса редакцин suvar@mail.ru электронлă почти çине е 89179076881 телефон номерӗпе Ватсап урлă ярса памалла. Сăнӳкерчӗкре камсен çемйи пулнине, вӗсем ăçта пурăннине, сăнӳкерчӗке ярса параканăн ятне тата хушаматне, адресне, телефон номерне палăртма манмалла мар. Конкурсăн положенийӗпе suvargazeta.ru сайтра тӗплӗнрех паллашма пулать. Сăнӳкерчӗксене октябрӗн 31-мӗшӗччен йышăнатпăр.
Эппин, сăнӳкерчӗксем кӗтетпӗр сиртен, хаклă вулакансем! Хутшăнмасăр ан юлăр!
В.Уканеева сăнӳкерчӗкӗ.
Следите за самым важным и интересным в Telegram-каналеТатмедиа
Нет комментариев