«Тунсăхпи»

Юлашки вăхăтра Чăваш кӗнеке издательствинче ачасем валли икӗ чӗлхеллӗ кăларăмсем тăтăшах пичетленеççӗ. Нумаях пулмасть кӗçӗн çулхи вулакансем валли Роза Шевлепин «Тунсăхпи. Грустинка» юмахӗ кун çути курчӗ. Кутăн-пуçăн çавăрса вуламаллискерӗн харăсах икӗ хуплашка: пӗрне уçсан чăвашла текстпа паллашма пулать, тепӗр енне çавăрсан – вырăслипе. Редакторӗ – Ольга Иванова, ӳнерçи – Татьяна Немцева. Тиражӗ – 1000 экземпляр.

Роза Шевлепи – чăвашсен паллă писателӗ тата педагогӗ, Чăваш Республикин культурăн тава тивӗçлӗ ӗçченӗ, Чăваш халăхӗн Эмине ячӗллӗ наци премийӗн тата Чăваш Республикин Алексей Талвир ячӗллӗ литература премийӗн лауреачӗ. Кӗнекене унăн «Тунсăхпи» юмахӗ кӗнӗ.

Хайлаври амăшӗ хӗрӗ хăйӗн пуканийӗпе калаçнине илтет. Хӗрача Натали ятлă пуканене темшӗн Тунсăхпи тесе чӗнет. Сăлтавне çапла ăнлантарать: Натали Ванюк ятлă пуканене юратса пăрахнă иккен, анчах ăна усал йытă йăтса тарнă. Çавăнтанпа чипер тетте тунсăхлать, савнă тусне кӗтет. Амăшӗ хӗрне пулăшас тӗллевпе лавккасенче Ванюка шырама пуçлать. Паллах, ăна тупаймасть, ун сăнлăрах пуканесене вара Тунсăхпи ниепле те йышăнмасть. Мӗнпур вăрттăнлăха уçса памăпăр, юмах мӗнпе вӗçленнине кӗнекене вуласан пӗлейӗр.

Ольга АВСТРИЙСКАЯ.

Автор сăнӳкерчӗкӗ.