Тутарстанра 5,5 пине яхăн студента транспорт грантне тӳлӗç
Çитес çул республика паракан пулăшăва илме аслă шкулта тата ятарлă вăтам пӗлӳ паракан вӗрентӳ учрежденийӗсенче вӗренекенсенчен 8 пин ытла заявка килнӗ. Вӗсенчен 5,5 пин студента суйласа илеççӗ. Грант илекенсем валли «Карта жителя Татарстана» уçаççӗ, унта кашни уйăхра укçа килсе тăрать. Кун пирки «Татар-информ» информаци агентствинче иртнӗ пресс-конференцире журналистсене ТР çамрăксен ӗçӗсен министрӗн пӗрремӗш çумӗ Софья Галиева-Мустафина каласа пачӗ.
«Тутарстанри аслă шкулсенче тата ятарлă пӗлӳ паракан заведенисенче 240 пине яхăн студент вӗренет. Транспорт грантне вӗренӳре ӗлкӗрсе пыракан тата активлă пурнăçпа пурăнакан студент илме пултарать. Йывăр лару-тăрăва лекнӗ çемьере пурăнакансене те тимлӗхсӗр хăвармастпăр», – пӗлтерчӗ министр çумӗ.
Софья Галиева-Мустафина каланă тăрăх, пӗлтӗр ку программăна кăшт урăхларах пурнăçа кӗртнӗ. Студентсене транспортшăн тӳленӗ укçана кэшбек пек каялла тавăрса панă. Анчах республикăри кашни студент транспортпа усă курманнипе ведомство грантăн условийӗсене пăхса тухнă.
ТР Студентсен лигин вице-президенчӗ Рамиль Багманов ăнлантарса панă тăрăх, программа республикăн кашни районӗнче (аслă тата ятарлă вăтам пӗлӳ паракан заведенисем пулсан) ӗçлеме пуçлать. Кăçал чи нумай заявка Хусанти федераллă университетран, КНИТУ-КХТИрен тата КНИТУ-КАИрен килнӗ.
Конкурсăн ӗç тăвакан директорӗ Виктория Чучалова пӗлтернӗ тăрăх, çӗнтерӳçӗсене декабрӗн 29-мӗшӗччен палăртаççӗ.
«Çитес çул çӗнтерӳçӗсене «Карта жителя Татарстана» парăнать. Унта кашни уйăхра (каникул вăхăтӗнчи уйăхсемсӗр пуçне) укçа килсе тăрать. Хусанта уйăхне 1,5 пин тенкӗ килет, вӗренӳ çулӗ вăхăтӗнче пурӗ 11 пин тенкӗ парăнать. Çырчалли, Анат Кама, Элмет тата Елабуга хулисенче пулăшу 10 пин тенкӗпе, ытти муниципаллă районсенче 8 пин тенкӗпе танлашать», – пӗлтерчӗ Виктория Чучалова.
Спикерсем каласа хăварнă тăрăх, грант укçине студентсем транспортшăн кăна мар, хăйсене кирлӗ çӗре яма пултараççӗ.
Следите за самым важным и интересным в Telegram-каналеТатмедиа
Нет комментариев