Уявсем çинчен – чăвашла
Нумаях пулмасть Чăваш Республикин Ача-пăча библиотекинче Чăваш кӗнеке издательствинче кун çути курнă «Уявсен кăшăлӗ. Наши праздники» кӗнекен хăтлавӗ иртрӗ. Кăларăмра календарьти уявсем пирки каласа панă. Çулталăкри уйăхсене шута илсе кӗнекене те 12 сыпăка пайланă. Кунта патшалăх, наци, халăхсен хушшинчи, официаллă мар тата ытти праçниксем пирки вуласа пӗлме пулать. Ачасемшӗн те, аслисемшӗн те интереслӗ ку кăларăм.
Уявсем пирки сыпăксенче хронологи йӗркипе мар, пӗлтерӗшне кура çырнă. Малтан праçник пирки чăвашла тата вырăсла кӗскен çырса кăтартнă, унтан чăваш поэчӗсен çак уяв пирки çырнă сăввине пичетленӗ. Кӗнекене Екатерина Васильеван ӳкерчӗкӗсем илем кӳреççӗ.
Кӗнеке хăтлавне ăна пухса хатӗрлекенӗ тата редакторӗ Ольга Федорова та килнӗччӗ. Мероприятие Шупашкарти 28-мӗш вăтам шкулта 5-мӗш класра вӗренекенсем хутшăнчӗç. Ольга Леонидовна ачасене кӗнекене еплерех хатӗрлени пирки каласа пачӗ.
– Эпӗ Ача-пăча библиотекипе тахçантанпах туслă. Раççейри издательствăсенче тухнă уявсем пирки çырнă кӗнекесемпе интересленсех паллашнă эпӗ кунта. Чăваш вулаканӗсем валли те çакăн пек паха кӗнеке хатӗрлесе кăларас кăмăл çуралчӗ. Хамăрăн та уявсем пайтах-çке-ха. Тӗслӗхрен, Республика кунӗ, Чăваш чӗлхи кунӗ, Чăваш тӗррин кунӗ тата ыттисем те. Çак уявсем пирки чи кирлӗ информацие пухрăм, чăваш поэчӗсен сăввисене суйласа илтӗм, – каласа пачӗ Ольга Федорова. Ачасене кӗнекен макетне, ӳнерçӗ тунă ӳкерчӗксен оригиналӗсене кăтартрӗ.
Вӗренекенсем хăйсене кăсăклантаракан праçниксем пирки вуласа пӗлчӗç, чăваш поэчӗсен сăввисемпе паллашрӗç. Уйрăмах Пӗтӗм тӗнчери çăкăр, Халăхсен хушшинчи сулахайсен, Пӗтӗм тӗнчери художник, Пӗтӗм тӗнчери йытăсен, Раççейри кушак кунӗсем çинчен вуласа пӗлме интереслӗ пулчӗ.
Дарья МОРОЗОВА.
Автор сăнӳкерчӗкӗ.
Следите за самым важным и интересным в Telegram-каналеТатмедиа
Нет комментариев