Халӑх календарӗ

• Утă уйăхӗн 2-мӗшӗ – Зосима. Пыл хурчӗсем вӗллесем патнелле вӗçеççӗ-тӗк – çумăра. Хуртсем усал, сăхасшăн сырӑнаççӗ пулсан – шăрăх çанталăк вăраха тăсăлать.

• Утă уйăхӗн 3-мӗшӗ – Мефодий. Çак кун çумăр çума пуçласан 40 кун çăвать тет. Кăткăсем йăвине пытанаççӗ – çиллӗ çанталăка. Çак кун çумăр çусан кӗркунне йӗпе-сапа пулать.

• Утă уйăхӗн 4-мӗшӗ – Ульян тата Ульяна. Çак кун татнă çăка чечекӗ уйрăмах сиплӗ теççӗ. Инçе çула тухмалла мар. Ку кун курнă тӗлӗк чăна килет теççӗ.

• Утă уйăхӗн 5-мӗшӗ – Евсей. Çак кун мӗн чухлӗ шăрăхрах, хӗлле çавăн чухлӗ сивӗрех пулать. Тӳпери уйăх уççăн ялтăртатать-тӗк – тухăçлă çул пуласса.

• Утă уйăхӗн 6-мӗшӗ – Аграфена. Иван Купала умӗнхи кун пухнă курăксем питӗ сиплӗ. Çак кун акнă çарăк чиперех ӳссе çитӗнет. Ырă вăйсене илӗртес тесен чи лайăх тум тăхăнмалла тет ку кун. 

• Утă уйăхӗн 7-мӗшӗ – Иван Купала. Ир çинчен вăйлă сывлăм ӳкнӗ-тӗк – хăяр ăнса пулать. Каçхи тӳпере çăлтăр нумай пулсан – кăмпа татма ытларах карçинкка хатӗрле. Начарри çинчен шутлама, кулянма юрамасть.