Хамăрăнни хамăра çитет

ТР ял хуçалăх министрӗ Марат Зяббарова питӗ тӗлӗнтернӗ ку. «Республика çыннисем хамăра хамăр 100 проценчӗпех кăна мар, ытларах та чи кирлӗ апат-çимӗçпе тивӗçтернине пӗлменни маншăн кӗтменлӗх», — тӗнӗ министр пӗтӗмлетӳ пирки.

Тутарстан апат-çимӗç корзинин тӗп продукчӗпе нумай çул ӗнтӗ хăйне хăй туллин тивӗçтерет. Урăхла каласан, пирӗн вӗсене ютран кӳмелле мар, веçех хамăр çӗр çинче ӳстерсе тирпейлетпӗр, тесе пӗлтерет ТР Ял хуçалăхӗпе апат-çимӗç министерствин пресс-служби.

Кашни çынна тивекен аш-какай, сӗт-çу, çăмарта, çăкăр нормăран та иртет, тӗрӗсрех каласан 100 процент ытла. Сахăр песокӗпе çӗрулми 300 процент таранах, хӗвел çаврăнăш çăвӗ вара кирлинчен 7 хут нумайрах.

 Хăй халăхне тӗп апат-çимӗçпе туллин тивӗçтерсен те республика ял хуçалăхне малалла аталантарать: çӗнӗ выльăх-чӗрлӗх фермисемпе комплексӗсем лартать. Юлашки 5 çулта 51,4 пин пуç ӗне-выльăх вырнаçмалăх 82 выльăх-чӗрлӗх комплексне хута янă. 2024 çулта талăкне 5 пин тонна сӗт сума тытăннă. Кун пекки республикăн историйӗнче те хальччен пулман. Выльăха шута илессине, пăхассине, апатлантарассине цифровизацилесси çине куçарать.

 Çӗр ӗçне çанталăкпа климат условийӗсен улшăнăвне пăхмасăр лайăхлатма тăрăшать. Ӳсен-тăран ӳстерессинче хамăр патра хатӗрлекен вăрлăхпа ытларах усă курать. Мелиораци комплексне çӗнетсе пыни типӗ çанталăкра шăварăнакан лаптăксен калăпăшӗ çуллен ӳсет. Хуçалăхсен машинăпа техника паркӗ çулсерен 3 пин единица техникăна çӗнелсе пырать. (Редакци архивӗнчи сăнӳкерчӗк).