Хусанта «Отец Героя» курав ӗçлеме пуçланă

Сăнӳкерчӗксенче ашшӗсен аллинче ывăлӗсен портречӗсем, хăшӗсем ачисен çар формине тăхăннă е унăн карттусне алла тытнă. Выставкăна пăхса тухнă май салтаксем пурнăçӗ çинчен тата вӗсем тунă паттăрла ӗçсем çинчен те каласа параççӗ.

Куравра Тутарстанăн 30 районӗнчен 45 портрет тăратнă. Вӗсенчен 4-шӗ Раççей Геройӗсен Раиль Габрахмановăн, Иван Додосовăн, Михаил Марцевăн тата Айнур Сафиуллинăн ашшӗсемпе тунă сăнӳкерчӗксем. Унсăр пуçне куравра Паттăрлăх орденӗн тулли кавалерӗсен ашшӗсен 32 портречӗ те пур. Вӗсем хушшинче Нурлат районӗнче çуралса ӳснӗ чăваш каччин, пурнăçне шеллемесӗр юлташӗсене хӳтӗленӗ Андрей Кульметьевăн ашшӗн Федор Ивановичăн сăнӳкерчӗкне тупма пулать.

Йӗркелекенсем курава Тутарстанри тӗрлӗ организацисемпе вӗренӳ заведенийӗсене илсе çитересшӗн.

Санӳкерчӗксем «Татар-информ» ИА тата nurlat-tat.ru сайтран.