Хусанта регионăн чи лайăх пулас бортпроводникне суйлаççӗ

Хусанти Авиаци институтӗнче «Профессионалы» Раççей чемпионачӗн чи хитре те яваплă «Бортовой проводник» компетенцийӗпе регионти тапхăрӗ пуçланнă. Çак дисциплинăпа иртекен иккӗмӗш чемпионат ку, тесе пӗлтерет аслă шкулăн пресс-служби.

Компетенцин тӗп эксперчӗ Валентина Юнусова пӗлтернӗ тăрăх, дисциплинăна программăна кӗртес пуçарупа «Аэрофлот» компани 2024 çулта тухнă.

«Эпир иккӗмӗш çул бортпроводник вăл сервиса, юриспруденцие, медицинăпа чун хавалне пӗрлештерекен ансат професси пулнине ӗнентеретпӗр кунта. Хăнăхусене студент чухнех вӗрентме тытăнмалла. Чемпионата хутшăнакан пулас проводниксен пысăк та нумай вăй хумалли модуль – вӗçев вăхăтӗнче пассажирсене пăхасси», – тенӗ эксперт чемпионата хакласа.

Финала тухассишӗн кăçал Лайăшри техникăпа экономика техникумӗн тата КНИТУ-КАИ техника колледжӗн студенчӗсем тупăшаççӗ. Пӗлтӗрхи конкурсантсем пурте хӗрсем кăна пулнă-тăк, кăçал пилӗк хӗрпе пӗр каччă. Эксперт сăмахӗпе, ку профессире ытларах каччăсене кӗтеççӗ. Мӗншӗн тесен кризислă лару-тăрусенче вӗсем хӗрсенчен лăпкăрах, вăй-халӗпе те вăйлăрах.

Конкурсантсем виçӗ кун хушшинче хăйсемпе паллаштарас хăнăхăва, нормативлă документсене пӗлнине, самолет сывлăша çӗклениччен салона  мӗнле хатӗрлемеллине, пассажирсене вырнаçтарса тухмаллине, аварипе çăлав оборудованийӗпе мӗнле усă курмаллине кăтартса тупăшаççӗ.

Ăмăртăвăн кульминацийӗ – вӗçев вăхăтӗнче пассажирсене пăхмалли, çав шутра ӗçмелли шӗвексем валеçмелли те, салонра пушар тухас пулсан  пулăшу памалли задани пулнă.

«Кунта пассажирсене пăхма кăна мар, вӗçев вăхăтӗнче салонра пушар тухсан, самолета усал шухăшлисем ярса илсен е тăрук япăх пулса кайса çын тăнне çухатсан тата ытти çакнашкал лару-тăру сиксе тухсан çăлма вӗрентеççӗ»,– чемпионатăн тӗп тӗллевӗпе паллаштарнă Валентина Юнусова.

Конкурсантсенчен пӗри, КНИТУ-КАИ техника колледжӗн студентки Адилия Гарифуллина, тӗслӗхрен, тӳпе çинчен мӗн ачаран ӗмӗтленет. Пуринчен ытла ăна самолетсем, çӳллӗш, çынсем хăйсен эмоцийӗсемпе илӗртеççӗ-мӗн. Çак чемпионат пулăшнипе ӗмӗтне пурнăçлама пултарать вăл.

КНИТУ-КАИ стратегилле аталанăвӗпе экономикин проректорӗн Эльвир Якуповăн сăмахӗпе, ку чемпионат пӗтӗм вӗрентӳ системипе отрасльшӗн пысăк пӗлтерӗшлӗ. «Ăмăрту кăна та мар вăл – аудиторипе вӗçев йăрăмӗ хушшинчи кӗпер. Аслă шкултан сывлăш карапӗсем патне çул хывни ку. Пирӗн тӗллев ахаль конкурс ирттернинчен ытла студент хăйне профессире тӗрӗслесе пăхмалли, ӗç паракан вара пулас специалистне вӗреннӗ вăхăтрах тупмалли чылай экосистема туса хурасси», – тенӗ вăл.

«Тулпар» тата «ЮВТ-Аэро» («Аэрофлотăн» бортпроводниксене хатӗрлемелли шкулӗ) тата ăмăрту валли чăн-чăн самолет креслисемпе тивӗçтернӗ «Авиаци интерьерӗсем» Хусанти предприяти пек партнерсем пулăшнипе асăннă аслă шкула чемпионатăн площадки пулма май панă. (Татар-информ сăнӳкерчӗкӗсем).