«Симӗс фитнес» пуçланать

Хусанта майăн 12-мӗшӗнче хула паркӗсенче «Симӗс фитнес» тӳлевсӗр спорт проекчӗ хута каять. Кăçал вăл спортăн 15 тӗсӗпе - йогăпа пилатесран пуçласа скандинавсен утти таранчченех пулӗ. Тренировкăсене профессилле тренерсем илсе пырӗç. Кун пирки «Татар-информ» ИАра иртнӗ пресс-конференцире ТР Çамрăксен правительствин экологипе çутçанталăк ресурсӗсен ыйтăвӗсемпе председателӗн канашçи, проект ертӳçи Мурат Димитров пӗлтерчӗ. Виçӗ çул хушшинче проект Тутарстансăр пуçне Раççей хулисене те сарăлма ӗлкӗрнӗ, кăçал унта 23 хула хутшăнать.