Кулăш тӗнчи

Кукша Кӗркури патне хăнасем килнӗ тет. Лараççӗ те лараççӗ хайхисем, килӗсене саланма васкамаççӗ. Кукшан тахçанах вӗсене ăсатасси килет ӗнтӗ... Тепăртакран аранах пуçтарăнма пуçлаççӗ килнисем.

– Эс пире ăсатса ан чăрман, хамăрах тухса каятпăр, – теççӗ хайхисем.

– Э-э, çук, хăнасене ăсатасси маншăн чăн-чăн киленӳ, – лаплаттарса хурать Кукша.

* * *

Ирхине вăраннă чух эп хама яланхинчен аванрах туятăп пулсан – эпӗ çывăрса юлнă. 

* * *

Кӳршӗлле пурăнакан Крахьян кинемипе Варвари аппа хăйсен пахчисене çум çумлама тухнă тет. Варвари аппа маскăпа. 

– Эс мӗн, коронавирусран хăратăн-и? – ыйтать Крахьян кинеми. 

– Ара, телевизорпа тăваттăмӗш хут сарăлать тесе хăратаççӗ-çке...

– Ан хăра, пирӗн пата çитмест вăл. Астумастăн-им, пире çул туса пама шантарнăччӗ, ăçта вăл? Газ та, шыв та кӗртме сăмах пачӗç... Пӗри те пирӗн пата çитмерӗ. 

* * *

– Алло, больница-и ку?

– Çапла. Мӗнпе пулăшмалла сире?

– Эп 3-мӗш палатăра выртакан Марье аппан сывлăхӗ пирки ыйтса пӗлесшӗнччӗ...

– Аванах унăн сывлăхӗ, кӗçех килне яратпăр. Хăвăр кам пулатăр-ха?

– Ку эпӗ, 3-мӗш палатăра выртакан Марье аппа. Выртап-выртап, никам та ним те калакан çук...