Хăюллă салтака республика ертӳçисем асăрханă

Пăва районӗнчи Хирти Кушкă каччи Николай Нестеров – пирӗн тахçанхи çывăх тус,  ялан çыхăнура эпир унпа. Кӗске отпуска таврăнсан «Сувар» хаçат редакцине кӗрсе тухма кашнинче вăхăт тупать. Январӗн 10-мӗшӗнчи тӗлпулу та акă пирӗн яланхи пекех ăшпиллӗн иртрӗ. Фронтри лару-тăру пирки кăна мар, малашнехи тӗллевсем тавра та пычӗ калаçу. 

Аса илтеретпӗр, Николай Нестеров ятарлă çар операцийӗнче 2022 çулхи кӗркуннеренпе. Унăн полкӗ неонацистсене хирӗç Донецк тăрăхӗнче кӗрешет. Николай малтан пӗрремӗш линире дрон операторӗччӗ-тӗк, кӗркуннерен – штурм отрядӗнче. Чи йывăр та хăрушă ӗçе пурнăçлать. Тепӗр тесен, хăрушсăрри пур-им вăрçăра?! Угледара, ун хыççăн Кураховăна ирӗке кăларма хутшăннă. Киле хальхинче отпуска шăп та Çӗнӗ çул каç, декабрӗн 31-мӗшӗнче, çитнӗ. Çапла калама çук пысăк парне тунă вăл ашшӗпе амăшне, çывăх тăванӗсене. 

Çулӗсемпе Николай çамрăк-ха, пурӗ те 28-та кăна. Апла пулин те патшалăх наградисене – «Ятарлă çар операцине хутшăннăшăн», «Салтак паттăрлăхӗшӗн» («За воинскую доблесть»), «Хăюлăхшăн» II степеньли, «Раççей оборонине çирӗплетнӗшӗн» медальсене – тивӗçме ӗлкӗрчӗ те ӗнтӗ. Пултарулăхӗпе вăр-варлăхне кура çар командованийӗ ăна тахçанах кӗçӗн офицерсен йышне илесшӗн – килӗшмест, мӗншӗн тесен малашлăха çарпа çыхăнтарас шутлă мар, хăйне урăх ӗçре курать.

Малӗмӗтлӗ те пултаруллă качча республика ертӳçисем асăрхама ӗлкӗрнӗшӗн çав тери савăнатпăр. ТР çамрăксен ӗçӗсен министрӗпе Ринат Садыковпа икӗ çул çыхăну тытнине иртнӗ тӗлпулусенчех каланăччӗ вăл. Январӗн 8-мӗшӗнче министр Николай Нестерова ятарласа хăй патне чӗнтернӗ. Шăпах малашнехи пӗрлехи плансем çинчен калаçнă вӗсем. Николай пек каччăсем, унăн опычӗ республикăри çамрăк ăрăва воспитани панă çӗрте питӗ кирлӗ халӗ. Çавăнпа Николайăн малашнехи ӗмӗт-тӗллевӗ пурнăçланасса çав тери шанатпăр.

 Сăмах май, ачалăхӗ Шупашкарта иртнӗ, унтах шкул пӗтернӗ пулсан та Николай чăвашлах тап таса калаçать, вулать те. «Сувар» хаçат тӗп редакторӗ Ирина Трифонова парнеленӗ хăйӗн «Тăлăх» кӗнекине акă фронта пӗрлех илсе кайнă вăл. Тăван чӗлхене лайăх пӗлни унта самай пулăшнине асăнчӗ ентешӗмӗр. Информацие раципе пӗлтерме кирлӗ иккен вăл. 

– Мӗнле унта, çӗнтерейӗпӗр-и, вăй çитерейӗпӗр-и? – пурне те çав тери хытă хумантаракан ыйтăва параймасăр пултараймарăмăр ентеш-салтака.

– Çӗнтеретпӗр, урăхла пулмасть. Çапăçусен тактики лайăхланчӗ, хӗç-пăшал çителӗклӗ. ВСУсен хӗç-пăшалӗ малтанхи пекех нумай пулсан та салтакӗсем питех усă курма пӗлмеççӗ вӗсемпе, кăмăлӗсем пусăрăннипе пăраха-пăраха тараççӗ. Кураховăна, тӗслӗхрен, çав тери пысăк çапăçупа илмерӗмӗр. Луганскпа Донецк республикисен 95 процентне ирӗке кăлартăмăр ӗнтӗ, – чăн лару-тăрупа паллаштарса лăплантарчӗ пире. 

Хаçат пичетленсе тухнă çӗре тусăмăр Николай Нестеров хăйӗн чаçне çитсе те пырать ӗнтӗ, январӗн 14-мӗшӗнче çула тухрӗ вăл. Тăван çӗршывăн хăюллă хӳтӗлевçине, çывăх тусăмăра хальхинче те пур енӗпе те ăнăçу сунса малалла та Турă пулăшса пырасса шанатпăр.

Ирина КУЗЬМИНА.

Н.Нестеров архивӗнчи сăнӳкерчӗк.