Дмитрий Никитин: «Китаецсене тӗлӗнтертӗмӗр»

«КАМАЗ-мастер» команда Ази­ри çак чи пысăк раллие хăйӗн историйӗнче пуçласа хутшăнчӗ. Ертӳçӗсем ку хутӗнче çамрăк пилотсем çине пусăм тунă: Китайри ăмăртăва Богдан Каримовпа (штурманӗ Дмитрий Никитин, механикӗ Ильгиз Ахметзянов) Алмаз Ахмедов (штурманӗ Иван Мальков, механикӗ Антон Шибалов) çамрăк пилотсем кайрӗç. 

16 куна тăсăлнă ăмăртура спорт­сменсене çăмăл пулма­рӗ. Пӗ­тӗмӗшле илсен вӗсен машинăна çăтса кӗртекен хăйăрлă пушхирсене, шурлăхсене, чăнкă тусене, чуллă çулсемпе çырма-çатрасене, хăйăрлă тăвăлсене парăнтарса 40 градуса яхăн шăрăх çанталăк­ра 3500 километра хыçа хăварма тиврӗ. Анчах Çырчалли спорт­сменӗсене кунпа хăратайăн-и? Паллах, çук. Темле йывăрлăха та пӗрле çӗнтерме хăнăхнă вӗсем. Акă Китайри раллире те «КАМАЗ-мас­терăн» икӗ экипажӗ те подиум çине хăпарма тивӗç пулчӗ: Богдан Каримов (502-мӗш) – 1-мӗш вырăн йышăнчӗ (47:01:55 вăхăтпа), Алмаз Ахмедов – 2-мӗш (+4:54:47). 3-мӗш вырăнта та Раççей спорт­сменӗ – Челябинск­ри «Урал Моторспорт» командăри Юрий Найман (+81:30:58). 

«Такла-Макан» раллинчи грузовиксенчен пурӗ 9 экипаж старта тухнăччӗ-тӗк, ăмăртăвăн 9-мӗш кунӗ тӗлне çак пъедестал çине хăпарма тивӗçнӗ виçӗ экипаж кăна юлчӗ. Ыттисем, техника ваннипе малалла каяйманран, ăмăртуран тухса ӳкрӗç. 

Пӗри паллă: Тутарстанра туса кăларакан «КАМАЗсем» темле йывăрлăха та чăтаяççӗ, темле çулпа та çӳрееççӗ. Паллах, спортсменсен ăсталăхӗнчен, пултарулăхӗнчен те нумай килет. «КАМАЗ-мас­тер» вара, «Суварта» та пӗрре мар çырнă кун пирки, командăпа ӗçлеме хăнăхнă. Çырчалли спорт­сменӗсем ралли-марафонсенче çав вăхăтрах пӗр-пӗринпе ăмăрт­сан та, кам-тăр йывăрлăха лексен нихăçан та пăрахса хăвармаççӗ, пӗр-пӗрне пулăшаççӗ. Çакă вӗсене çӗнтерме пулăшать те. Ку хутӗнче те çаплах пулчӗ – экипажсем пӗр-пӗрне пулăшса пычӗç. 

Китайра та Аксу пур

Тунтикун Китайри Аксу хулинче «Такла-Макан» ралли-марафон вӗçленсенех эпир Дмитрий Никитинпа çыхăнтăмăр, çӗнте­рӳпе саламласа ăмăрту пирки тӗплӗнрех каласа пама ыйт­рăмăр. Чи малтан таçта та пулса курнă спорт­сменсене Китайра еплерех йышăнни интереслентерчӗ пире.

– Малтан пире сиввӗнрех йы­шăнни уççăнах сисӗнчӗ. Ăмăрту уçăлнă кун Китай спортсменӗсен хутшăнакансемпе пӗрле сăн ӳкерӗнес йăла пур иккен. Çакăн пирки пире вăхăтра пӗлтерменнипе эпир каярах юлса пытăмăр. Китаецсем хăйсем çакăншăн питӗ кăмăлсăр пулнине пытармарӗç. Анчах пӗр-икӗ кунран лару-тăру улшăнчӗ: хамăр мӗн пултарнине кăтартнă хыççăн вӗсем пирӗнпе хăйсем малтан сывлăх сунма, кашни ир ăнăçу сунма пуçларӗç. Китаецсем анлăн усă куракан ВиЧат мессенджерти сториссенчен çурри ытларахăшне пирӗн машинăсене халалланăччӗ. Ăмăрту пуçларӗç вӗсем – кам «КАМАЗ» автомобильсемпе интереслӗрех видео ӳкереет. Кунсерен пирӗнпе сăн ӳкерӗнес, автограф илес текенсем йышланса кăна пычӗç, – каласа парать Дмитрий. 

Ăмăртăвăн хăйнеевӗрлӗхӗсем пирки ыйтсан йӗркелекенсенчен кирлӗ информацие ыйтса пӗлме çăмăл пулманнине палăртрӗ. Китаецсен хушшинче вырăсла, çаплах акăлчанла та, пӗлекенсем сахал-мӗн. Анчах пирӗннисем аптраканнисем мар, китайла ăнланма та майне тупнă. Тепӗр çӗнӗлӗх Çырчалли спорт­сменӗсемшӗн Китайри раллире кашни ятарлă участок иртмессерен çав кунхи çӗнтерӳçӗсене чыслани пулнă. Ăмăрту 13 тап­хăртан тăнă, Богдан Каримов экипажӗ 9-шӗнче çӗнтерӳçӗ пулнă – 9 медальпе кепка панă вӗсене куншăн. 

Йывăрлăхсенчен Дмитрий çанталăк питӗ шăрăх тăнипе – 35 градус ытла – йывăр пулнине асăнчӗ. Хупă кабинăра питӗ шăрăх, кондиционер та чăтаймасть, ӗçлеме пăрахать. Спортсменсен çийӗнче вара термобелье, комбинезон, пуçӗсенче шлем... Вӗри сывлăша чăтма питӗ кăткăс, шыв ӗçни кăна кӗске вăхăта пулăшать. «Китайра грузовиксен ăмăртăвне ирттересси аталанман. Вӗсен экипажӗсем шлемсăр, перчеткесӗр, футболкăпа кăна ларса пыраççӗ. Эпир вара пӗтӗм правилăсене пăхăнса хутшăнатпăр. Çавăнпах пуль пире курсан вӗсем çăварӗсене карса пăрахрӗç темелле. Вӗсем финиша çитейменнинчен тӗлӗнме кирлӗ мар эппин. Пысăк хăвăртлăхлă ăмăртура тем те пулма пултарать. Шел те, ку ралли-марафон инкексӗр иртмерӗ: Китай спорт­сменӗсен пӗр экипажӗ машинипе çаврăнса ӳксен пилота çăлса хăварайман», – каласа парать ­Д.Никитин. 

Китайри Аксу хулинчен ентешӗмӗр ятарласа «Сувар» вулаканӗсем валли видео та ӳкерсе ячӗ ăмăртăвăн юлашки кунӗсенче. Ăна хаçатăн социаллă сечӗсемпе мессенджерӗсенче курма пулать.

Китайра иртнӗ раллие хутшăнса «КАМАЗ-мастер» черетлӗ хут хамăр техника çирӗплӗхне, пирӗн спортсменсем питӗ пултаруллă пулнине, командăпа ӗçлени пысăк çитӗнӳсем тума пулăшнине кăтартса пачӗ. 

«КАМАЗ-мастер» командăн пресс-службин сăнӳкерчӗкӗ.