«Кӳршӗ» проект шайӗнче йӗркеленӗ уявра хӗрарăм-волонтерсем çӗнтерчӗç

Праçнике хутшăнакансемпе хăнасем пӗр самантлăха та кичемленсе лармарӗç кунта: творчествăлла коллективсем пӗрин хыççăн тепри юрă-ташăпа са­вăнтарчӗç, ачасемпе аслисем тӗрлӗ вăйăсем вылярӗç, конкурссенче ăмăртрӗç, лашасемпе ярăнчӗç, алкогольсӗр глинтвейн­па хăналанчӗç. 

«Раштав пӗремӗкӗ» конкурс питӗ хӗрӳ иртрӗ. Унта «СВОих не бросаем Аксубаево» волонтерсен ушкăнӗн хастарӗсем питӗ активлă хутшăнчӗç. Паттăр салтакăн амăшӗ Светлана Крайнова тивӗçлипе 1-мӗш вырăн йышăнчӗ. Унăн «Çӗнтерӳ пуйă­сӗ» пӗремӗкӗ пурне те тӗлӗнтерчӗ: вакунӗсенче йăлтăртатса çунакан гирлянда çутисем пу­йăс кӗçех Çӗнтерӳ çинчен хыпар илсе килессӗн туйăнчӗç, ун чух вара пирӗн ывăлсем, мăшăрсем тата аттесем тинех тăван килсене таврăнӗç. 

Наталия Сафронован «Çыр­лаллă Васильевка» волонтер карçинкки те тимлӗхсӗр юлмарӗ. Наталия салтаксене пулăшма пӗтӗм чунне панă пекех, çак творчествăлла ӗçне те питӗ тăрăшса тунă: тӗрленӗ алшăллисемпе, ăшне курага хурса пӗçернӗ калама çук хитре пӗремӗксемпе илемлетнӗ. 

Хӗрарăм-волонтерсем – маттурсем! Пур çӗрте те хастар. Тавах вӗсене. Çак уяв пӗрле пулни, пӗр-пӗрне тӗрев пани, ыррине шанни питӗ пӗлтерӗшлине тепӗр хут çирӗплетсе пачӗ. Хытă шансан ӗмӗтсем пурнăçланаççех!

(Татьяна МАКСИМОВА. Аксу районӗ, Саврăшпуç.Автор сăнӳкерчӗкӗсем).