ПОЭЗИ КӖТЕСӖ

Килӗшӳ кирлӗ 

халь халăхра

Пӗр эрне те иртмест пытармасăр

Вăрçăра вилекен паттăра.

Вăрçине, типпине те пăхмасăр

Пухăнатпăр час-час уявра.

Халăхран укçа-тенкӗ пухатпăр

Пулăшма салтака, тăлăха.

Уявсем ирттеретпӗр, тăкатпăр –

Чакаратпăр, тăкса, пурлăха.

Вăрçăшу кунӗсем тăсăлаççӗ, 

Вăраха кайрӗ вăл ытлашши.

Тăшмансем мирлешме шутламаççӗ…

Кирлӗрех пулăшу парасси.

Йывăр тапхăр чухне питӗ кирлӗ

Пӗр-пӗрне, çӗршыва пулăшни.

Кам аманнă, кам пӳртсӗр, кам чирлӗ, 

Пулăшни – Аслă Турă хушни!

Памалли пулмасан эс параймăн,

Йăлăнса, пуççапса та ыйтсан.

Пурлăху пулмасан пулăшаймăн,

Чун-чӗрӳ пулăшмашкăн хушсан…

Сайрарах уявсем ирттересчӗ,

Ытлашши укçа çук çӗршывра.

Пуррине тӗрӗсрех валеçесчӗ –

Килӗшӳ кирлӗ халь халăхра…

Таврăн сывă, салтак

Таврăн сывă, салтак – хӳтӗлевçӗ,

Таврăн сывă киле аякран.

Питӗ кирлӗ пире кунта эсӗ –

Таврăнсамччӗ часрах вăрçăран!

Кашни кун кӗлтăватпăр, ыйтатпăр,

Пуççапса, çуртасем çутатса.

«Упрасамччӗ!» – тесе йăлăнатпăр

Туррăма, мухтаса та шанса!

Юрататпăр, тăванăм, кӗтетпӗр –

Кунӗн-çӗрӗн кӗтетпӗр сана.

Кӗлтăватпăр Турра, ӗненетпӗр –

Таврăнан, аркатса тăшмана!     

Андриян ГРИГОРЬЕВ.

Нурлат.