Пушăн 3-мӗшӗ – шӗпшӗл кайăкӗн кунӗ

◊ Нарăсăн 27-мӗшӗ – Кирилл. Çак кун çанталăк лăпкă та уяр-тăк – сивӗтессе. 

◊ Нарăсăн 28-мӗшӗ – Онисим. «Онисим кунӗнче хӗлӗн те мăйраки катăлать». Тумла пăрӗсем тем тăршшӗ çакăнса тăраççӗ пулсан – çуркунне вăрăма тăсăлать.

◊ Пушăн 1-мӗшӗ – Ярила. Çуркуннен пӗрремӗш кунӗ. Анчах та пирвайхи кунранах ăшăтса янине шанмалла мар-мӗн. 

◊ Пушăн 2-мӗшӗ – Федор тата Мариамна. Çак кунхи çанталăк çулла мӗнле пулассине кăтартать теççӗ. Каçхи тӳпери йăлтăркка уйăх – тырă ăнса пуласса; çумăр çуни – йӗтӗн аван çитӗнессе. 

◊ Пушăн 3-мӗшӗ – шӗпшӗл (овсянка) кайăкӗн кунӗ. Çак кун тӗлне шӗпшӗл вӗçсе килнӗ-тӗк – кӗçех çанталăк ăшăтать. Ку вăхăтра çанталăк ултавлă-ха: «Çӳлтен юхать, аялта пăрланать», – тенӗ сăнавçăсем. 

◊ Пушăн 4-мӗшӗ – Архип тата Филимон. Вăрманта шурă мулкача тӗл пулсан – юр тата та çăвать-ха; сăрă мулкача курни вара ăшăтиччен вăрах кӗтмелле мар. 

◊ Пушăн 5-мӗшӗ – Лев Катанский, Катыш. Çак кун юлашки хут сăрт çинчен çунашкапа ярăннă. Каçхине тӳпенелле пăхмалла мар: ӳкекен çăлтăр курсан – ырра мар.

Светлана Колесникова сăнӳкерчӗкӗ.