Хусанта Çеçпӗл Мишшин 125 çуллăхне халалланă литература каçӗ пулать

Курма килекенсене  чăваш поэчӗн литературăра юлнă пуянлăхӗпе, ЧР Наци библиотекинче упранакан хайлавсен коллекцийӗпе  паллаштарӗç. Литература каçӗ тӗлне Çеçпӗл Мишши Анастасия Червякова патне çырнă сăвăсен пуххине библиотека  пӗчӗк кӗнеке евӗр кăларнă. Вырăсларан чăвашла çырусене Юрий Сементер куçарнă, сăвăсене – Петӗр Хузанкай. Сборника хастар хутшăнакансене парнелессине те пӗлтереççӗ йӗркелӳçӗсем.

Литература каçӗнче Çеçпӗл Мишшин театр сцени çинчи сăнарне те  тимлӗхсӗр хăвармӗç. Çеçпӗл Мишши ячӗллӗ Чăваш патшалăх çамрăксен театрӗн артисчӗсем «Ҫӗн Кун Ачи» (Сын нового дня)  спектаклӗн пӗр пайне кăтартӗç.

ТР Наци библиотекинче «Пурӑн, пирӗн Ҫеҫпӗл! = Живи, наш Сеспель!» сборникăн презентацийӗ те иртет.  Унта Çеçпӗл Мишшин пултарулăхне юратакан Раççейӗн тӗрлӗ регионӗсенчи поэтсен вырăс тата чăваш чӗлхипе çырнă литература хайлавӗсене кӗртнӗ.

Кăмăл тăвакансем уçă микрофонпа усă курса поэтăн сăввисене чăвашла, вырăсла тата тутарла вулама пултараççӗ.