Петр Мульдияров тăванӗсемшӗн ырă кукка, йăхри аслă çын пулнă

Эпир сана медицина наукисен докторӗ, профессор, пысăк ăсталăхлă ревматолог пек пӗлетпӗр. Эсӗ çын куçӗ курма пултарайман чирсене – пире хускалма май паракан сыпăсене сиплеттӗн. Анчах та санăн тӗп ăслăлăху Мускав клиникисенче пуçланман, Петр Ярушкович. Вăл тӗттӗм чăваш ялӗнче, Тутарстанри Элмет районне кӗрекен Пакрашра пуçланнă. Эсӗ, 11 ачаллă çемьере çуралса вăрçă вăхăтӗнче ӳснӗскер, çăкăр чӗллин, кил вучахӗн ăшшин чăн-чăн хакне мӗн ачаран пӗлнӗ. Вӗреннӗ вăхăтра вутă йăтса кăмака хутнăскер, грузчик пулса ӗçленӗскер хӗн-хур мӗнне ун чухнех лайăх ăнланнă эсӗ. Çавăнпа эсӗ чир-чӗре кăна мар, çынсен чунне те сипленӗ.

Эсӗ Мускаври обществăна ертсе пынă, унăн чӗри пулнă. Эсӗ съездсемпе Акатуйсем йӗркелесе ирттернипех çырлахман. Эсӗ «ЗиЛ» заводри кашни чăваш патне хăв шăнкăравланă, вӗсене Мускавра пӗчченшерӗн çухалса пурăнасран хăтарнă, вӗсен пӗрлехи килӗ пурри пирки аса илтернӗ. Эсӗ хамăр халăхăн иртнипе пуласлăхӗ хушшинче кӗпер хывнă.

Паллах, эсӗ историк та. Этем кӗлеткин вăрттăнлăхӗсене пӗлсе çитсен этногенеза тӗпчеме пуçланă. Юханшывсен ячӗсенче скифсен тымарӗсене шыранă, йăхсен историйӗсене шӗкӗлченӗ – хамăр камсем пулнине пурте пӗлччӗр тенӗ. Хăйӗн тăван халăхне юратакан чăн-чăн ăсчах ансăр специалист кăна пулманнине хăвăн тӗслӗхӳпе çирӗплетнӗ эсӗ.

Пирӗншӗн вара эсӗ Петӗр куккаччӗ. Хăвшăн çăмăл мар япаласем пирки калаçнă чух та эсӗ хаваслă пулма тăрăшаттăн. Халӗ вара сана ăсатнă чух эпир хамăрăн йăх-несӗлсем каланă пек: «Петр Ярушкович, йывăр тăпру çăмăл пултăр. Сывлăхупа, пурлăхупа телей курса выртма телей пултăр!» – тетпӗр. Хăв вӗрентсе хăварнă ăсу-пуçу, ырă яту ӗмӗрлӗхех пирӗнпе юлтăр. Эпир сана нихăçан та манмăпăр. Леш тӗнчере канлӗх тупма сунатпăр. Эсӗ чăваш ялӗнчен тухса тӗнче шайӗнчи наукăн тӳпине çити çӗкленнӗ, нихăçан та ятна яман. Эсӗ пирӗн тӗрев пулнă, пулатăн та.

Лăпкă çывăр, пирӗн хаклă кукка. Хăвăн Çӗр çинчи миссине тивӗçлӗн пурнăçланă эсӗ.

Мульдияровсем, Клестовсем, Лукинсем, Селивановсем, Зайдуллинсем, Байтимировсем, Васильевсем, Фархутдиновсем.

Мульдияровсен çемье архивӗнчи сăнӳкерчӗк.